Xitayning Mu’awin Döwlet Reyisi Zeng Qing Hung, Merkezning Sherqiy Türkistan Siyasitidiki Mohim Nuxtilar Heqqide Toxtaldi

< Tianshan tori > ning xewer qilishiche, Xitay kommunistik partiyesi merkizi komutélining ezasi we Xitayning mu’awin Döwlet reyisi Zeng Qing Hung, 3 – ayning 8 – küni chüshtin kéyin, < 10 – nöwetlik memliketlik xelq wekiller qurultiyi 5 – qélimliq yighini > gha qatnishiwatqan < Xinjiang wekiller ömigi > ning muzakire yighinigha qatniship qilghan sözide, Xitay merkizi hökümitining Sherqiy Türkistangha qaratqan siyasitidiki mohim nuxtilar üstide toxtalghan.

Zeng Qing Hung, Sherqiy Türkistanning Xitay üchün intayin mohim stiratigiyélik ehmiyetke ige ikenlikini, shunung üchün merkizi hökümetning bu rayongha alahide ehmiyet bérip kéliwatqanliqini tekitlep ötkendin kéyin, < Xinjiangning muqimliqigha kapaletlik qilish bolsa, wetenning birlikini we döwlitimizning bixeterlikini qoghdashtiki stiratigiyélik qedemlerning biri > dep körsetken.

Zeng Qing Hung, < aptonom rayon > diki her derijilik partiye – hökümet organlirining, muqimliqtin ibaret bu chong xizmet yolünishini chöridigen asasta, merkizi hökümetning < Chong gherbi shimalni echish pilani > gha aktip türde masliship, Sherqiy Türkistanning Nefit, Tebiygaz we bashqa kan bayliqlirini echish qedimini tezlitishni, milletler ittipaqliqi terbiyesini kücheytip, < Xenzular azsanliq milletlerdin ayrilalmaydu, azsanliq milletlermu Xenzulardin ayrilalmaydu, azsanliq milletlermu bir – biridin ayrilalmaydu > digen idiyeni kishiler idiyesige mehkem singdürüshni telep qilghan.

Zeng Qing hung yene, Sherqiy Türkistandiki azsanliq millet kadirlirini < milliy bölgünchiler > ge qarshi küreshning aldinqi sépide chéniqturush we bu jeryanda sinaqtin ötken yax’shi kadirlarni tallap chiqish kerekligini, < 3 xil küchler > din hush’yar bolup, milliy < bölgünchilik > heriketlirige qattiq zerbe bérish lazimliqini bayan qilghan.

Zeng Qing Hung bu qélimqi yighinda Bing tuan rehberlirige bergen yolyoriqida, Bingtuanning wetenning birliki we chegra rayonning muqimliqini qoghdashta körsetken töhpilirige yuquri baha bérish bilen birge, Bingtuandin, chegrani qoghdash we < 3 xil küchler > ge zerbe bérish iqtidarini, shundaqla xelq ichidiki ziddiyetlerni we tuyuqsiz yüz bérish ehtimali bolghan topolanglarni basturush iqtidarini ashurup, bu rayonning muqimliqigha kapaletlik qilishni telep qilghan.

Bu qélimqi muzakire yighinigha, < Xinjians wekilliri > bilen birge yene < Aptonom rayonluq partikom >, < aptonom rayonluq xelq hökümiti > we Bingtuanning asasliq rehberlirining hemmisi qatnashqan bolup, ular, merkezning < chong gherbi shimal echish siyasiti > ge we muqimliq xizmitige pütün küchliri bilen aktip maslishidighanliqini bildürgen.

Zeng Qing Hung sözini, < Xinjiang yax’shi jay > digen nax’sha bilen tamamlighan.

Yuqarqi xewerde yene, Sherqiy Türkistanning omomiy noposining 62 pirsentining dehqan – charwichilardin terkip tapqanliqini we yéza noposining köpünchisining hazirmu hem namratliq halitide turiwatqanliqi qeyit qilinghan.

Zeng Qign Hungning yuqarqi sözliri, Xitay hakimiyitining Sherqiy Türkistandiki milliy heriketlerge qaritip kéliwatqan qattiq basturush siyasitini yenimu kücheytidighanliqidin direk berse, yene bir tereptin unung Bingtuange qarita qilghan sözliri, Bingtuanning esli qiyapitini we mahiyitini ochuqche izahlap turmaqta..