Abdujélil Qaraqash:
Xitay Xelq Qurultiyi We Siyasi Kengishidiki Uyghur Wekiller Rabiye Xanimni Ülge Qilishi Lazim

< Tianshan Tori > ning xewiride körsütülishiche, Sherqiy Türkistandin Xitay xelq qurultiyigha qatnishidighan 59 wekil bilen, Xitay siyasi meslihet kengishi yighinigha qatnishidighan 35 wekil 3 – ayning 1 – künidin étibaren Ürümchidin Bei Jing’gha yürüp ketken. Siyasi kengesh yighinigha qatnishidighan 35 neper wekil 11 millettin terkip tapqan iken. Wekillerning eng chongi 72 yash, eng yéshi bolsa 34 yash iken.

Mezkur xewerde körsütülishiche, < 10 – nöwetlik Xitay xelq siyasi meslihet kengishi 5 – qétimliq omomiy yighini > 3 – ayning 3 – küni chaqirilidu, 3 – ayning 4 – küni bolsa < 10 – nöwetlik Xitay xelq qurultiyi 5 – qétimliq omomiy yighini > bashlinidu.
Yuqarqi xewerde, bu qétimqi ikki qurultaygha qatnishidighan wekillerning milliy terkibi heqqide hechqandaq izahat bérilmigen.

Bash shitabi Germaniyening München shehridiki < Sherqiy Türkistan Informatsiyon Merkizi > ning pirezidenti Abdujélil Qaraqash ependi bu munasiwet bilen özining qarashlirini otturigha qoyup, < Xitay xelq qurultiyi we siyasi kengishige wekil qilip körsütülgen Uyghurlar milliy rehbirimiz Rabiye xanimning eyni chaghdiki jasaritini özlirige ülge qilip, öz xelqighe zulum séliwatqan mustebit Xitay hakimiyitining awazi emes, belki éziliwatqan we milliy mewjutluqi zor xewipke duch kéliwatqan Sherqiy Türkistan xelqining awazi we hamisi bolushqa tirishishi lazim > dep körsetti.

Abdujélil Qaraqash mundaq didi: < Xitay xelq qurultiyi we siyasi meslihet kengishige wekil bolghan Uyghurlarni xelqimizning wekili diyishke esla bolmaydu, chünki ular xelqimiz teripidin erkin halda saylap chiqilmay, belki kommunistik hakimiyet teripidin biwaste teyinlengen, elwette ularning ichidimu ghurorluq insanlar yoq emes, Rabiye xanim we Abdurehim ötkürler del ene shu wekillerning ichidin chiqqan ghurorluq, jesur hem wijdanliq insanlar idi, bolupmu Rabiye xanim < Xitay xelq siyasi meslihet kengishi > ge eza bolup turghan mezgilliride bashtin – axir öz xelqining milliy menpe’etlirini chiqish nuxtisi qilghan, kommunistik hakimiyetke esla bash egmigen, Xitay hakimiyitining Uyghur xelqighe séliwatqan zulmini we bu hakimiyetning adaletsiz siyasitini merdanilarche pash qilghan we eyipligini üchün, hakimiyetning siyasi ziyankeshlikige uchrighan, shundaqla bu jeryanda nahayiti zor bedel töligen idi, Rabiye xanim ene shu pidakarliqi we alijanapliqi bilen xelqimiz qelbide texit qurup, bügünki künde “ Uyghurlarning meniwiy anisi > digen shereplik namgha érishti >.

Abdujélil Qaraqash tekitlep mundaq didi: < Mustemlikichi hakimiyet bilen éghiz – burun yaliship öz xelqighe zulum salghan we ziyankeshlik qilghan milliy munapiqlarni xelqimiz hergiz kechürmeydu we kelgüside ulardin choqum hésap alidu, xuddi quduretlik Soweyt ittipaqining parchilinip yoq bolghinidek, kommunist Xitay hakimiyitimu haman bir küni yimirilidu, Dunya jama’etchilikimu kommunizimning bu eng chong lagirining uzun muddet mewjut bolup turushini hergiz xalimaydu, shunga Xitayning türlük hakimiyet organlirida ishlewatqan Uyghurlar peqet köz aldidiki menpe’etlirinila emes, kelgüsi istiqbalinimu oylap qoyushi lazim >.