Sherqiy Türkistanda Éghir Xarektirlik Poyez Weqesi Yüzberdi

<< Xinhua Axbarat Agentliqi > ning xewer qilishiche, 2 – ayning 28 – küni seher 1.55 etrapida, Ürümchidin Aqsugha qarap kétiwatqan 5806 – qétimliq yoluchilar poyezi Turpan tewesige kirgende 13 bal shiddetlik borangha duch kélip, parawuz rélistin chiqip ketken we 11 wagon boranning küchide örülüp chüshken.

Deslepki melumatlargha qarighanda hazirghiche qazada 3 kishi ölgen, 2 kishi éghir yarilanghan, 32 kishi yenik yarilanghan.

< Tianshan Tori > ning yene bir xewiride körsütülishiche, hazirghiche ölgenler 4 neper, yarilanghanlar bolsa eng az 100 kishi bolup, ölgenlerning sanining éshish éhtimali yuquri iken.

Weqedin keyin, Ürümchi tömüryol idarisi Sherqiy Türkistanning jenobigha qatnaydighan poyez qatnishini toxtutushqa mejbur bolghan. Undin bashqa yene Xitaygha qatnaydighan poyezlarmu waqitliq toxtutulghan.

Hökümetning tunji qutqazghuchi xadimliri weqe yüzbérip ikki sa’ettin keyin aran neqmeydangha yétip baralighan, yarilanghanlar bolsa etraptiki doxturxanilargha orunlashturulghan.

Xitay metbu’atlirida, bu qétimqi weqede ölgen we yarilanghanlarning milliy terkibi heqqide izahat bérilmigen bolsimu, emma metbu’atlarda elan qilinghan resimlerde, poyezdikilerning hemmisining Xitaylar ikenliki körülmekte.

Xitay hakimiyiti, Xitaydin Sherqiy Türkistangha tutushidighan poyez leniyesini tesis qilghandin buyan, Sherqiy Türkistanning yerlik Xelqi poyezgha nepret tuyghusi bilen qarap kelmekte, chünki Uyghur xelqining neziride poyez, Sherqiy Türkistangha Xitay köchmini yötkesh we Sherqiy Türkistanning tebiy bayliqini talan – taraj qilishning simowuligha aylinip qalghan.

Sherqiy Türkistangha her küni poyez arqiliq eqip kiridighan Xitay köchmenlirining sani 15 mingdin ashidu. Bolupmu Sherqiy Türkistanning jenobi rayonlirigha poyez qatnishi yolgha qoyulghandin buyan, Qeshqer, Aqsu, Atush we Hoten rayonliridiki Xitay köchmenlirining sani roshen derijide éship, yerlik xelq arisida qattiq endishe peyda bolghan idi.