Xitayning Ichki Ölkilirige Medikarliqqa Tutup Bérilgen Uyghur Yashlirining Sani 200 Mingdin Éship Ketti

Xitay hakimiyiti, < Chong gherbi shimalni échish stiratigiyelik pilani > ni yolgha qoyghandin buyan, Uyghurlarni atsimilatsiye qilip yoqutush siyasitige alahide ehmiyet bérip kelmekte.

Xitay hakimiyitining nöwette Uyghur yashlirini keng kölemde Xitayning ichki ölkilirige bérip ishleshke seperwer qilishtiki asasi meqsidimu, ghayet zor Xitay qaynimi ichide ularning milliy ghurorini, diniy étiqadini ajizlashturush, ulargha asta – asta Xitay mediniyitini singdürüsh we bu arqiliq Uyghur xelqining Xitaylashturush qedimini tézlitishtin bashqa nerse emes.

Xitay hakimiyiti bir tereptin < emgek küchi yétishmeydu > digen niqap bilen Xitayning ichki ölkiliridin zor türkümde Xitay köchmenlirini yötkep kélip Sherqiy Türkistangha yerleshtürse, yene bir tereptin, < eshincha emgek küchlirini ichkiri ölkilerge bérip ishleshke righbetlendürüsh > digen sho’arni kötürüp chiqip, Uyghur yashlirini türlük chirayliq wediler bilen Xitayning ichki ölkiliridiki Xitay xojayinlirigha medikarliqqa tutup bermekte.

< Xelq géziti > ning 2 – ayning 26 – künidiki xewiride körsütülishiche, hökümet terepning teshwiq qilishi bilen, hazir her yili Xitayning ichki ölkilirige bérip ishlewatqan Uyghur yashlirining sani 200 mingdin éship ketken.

Xitay hökümiti, téximu köp Uyghur yashlirini ichkiri ölkilerge yüzlendürüsh üchün, her qaysi nahiyelerning asasliq bir neper rehbirini bu ishqa mesul qilip, wilayet, nahiye we yéza derijilik mulazimet we meslihet ponkitlirini qurup chiqqan.

Wetendin kelgen inkaslargha qarighanda, nöwette Sherqiy Türkistandin Xitayning ichki ölkilirige élip kétiliwatqan Uyghur yashlirining mutleq köp qismi qizlar bolup, < zawutlargha ayal ishchi lazim > digenni bahane qilip, meqsetlik halda ayallarni asasi yötkesh nishani qilghan. Xitayning ichki ölkilirige elip berilghan bu Uyghur qizlirining xéli köpliri Uyghurlarning exlaq ölchimige we milliy en – enilirige tamamen zit kélidighan nashayan ishlarni qilishqa zorlanghan we bu jeryanda kishining yürikini azaplaydighan échinishliq tiradigiyeler meydangha kelgen.

Xitayning resmiy statiskilirida körsütülishichimu, peqet ötken bir yil ichidila Xitay hökümiti < paxta yighiwelishqa emgek küchi yétishmeydu > digenni bahane qilip, Xitayning ichki ölkiliridin bir milyondin artuq Xitayni yötkep éyigha 1500 – 2000 yuan ma’ash bérip ishletken idi, shunga Xitay hökümitining < eshincha emgek küchlirini ichkiri ölkilerge bérip ishleshke seperwer qilish > digen siyasitining ichki yüzini körüwélish tes emes ! .