Nezerbayef Berlinda Qazaqistanning Kishilik Hoqoq Weziyitini Maxtap Kökke Köterdi

Qazaqistan pirezidenti Nursultan Nezerbay, Germaniyege Qilghan 5 – qétimliq döwlet ziyaritini resmi bashlidi.

Germaniye metbu’atlirida, Qazaqistanning kishilik hoqoq mesiliside Yawropa ellirining izchil türde eyiplishige uchrap kéliwatqanliqi tekitlengen bolsimu, emma Nezerbayef Berlinda qilghan sözide Qazaqisqannning siyasi islahatini we demokratik tüzümini maxtap kökke kötergen we kishilik hoqoq mesiliside zor ilgirlesh hasil qilghanliqini bayan qilghan. Nezerbayef mundaq dep körsetken: < biz kishilik hoqoq mesiliside söhbet ötküzüshni xalaymiz, ötken birqanche yildin buyan biz tenqitke uchrighan mesililerning hemmisini tüzettuq, sabiq soweyt ittipaqi qarmighidiki respoblikilar ichide, baltiq döwletlirini hisapqa almighanda, Qazaqistan meyli iqtisadi jehettin bolsun, meyli siyasi islahat jehettin bolsun hemmining aldida mengiwatidu >.

Nezerbayef yene maxtinip, < Qazaqistanda erkin saylamni yolgha qoyduq, bizde hazir siyasi jinayetchi yoq, axbarat sahesimu nazaretke uchrimaydu, teximu mohim bolghini shuki, biz döwlitimizdiki 130 milletke we ular etiqat qiliwatqan 46 xil dingha muqim we bixeter mohit yaritip berduq, dunyadiki qaysi bir döwlet bundaq qilalaptu ? > dep bayan qilghan.
Germaniye bash ministiri Merkel xanim Nezerbayef bilen körüshüp qilghan sözide, < ikki terep kishilik hoqoq mesiliside yenimu ilgirligen halda söhbet élip barduq, biz, qanun döwliti qurush we qanun – tüzüm turghuzup chiqish jehette Qazaqistangha yardem berishni xalaymiz > dep körsetken.

Emma gherip metbu’atliri, del Nezerbayefning sözining eksiche, Qazaqistanning kishilik hoqoq xatirisining intayin nachar bolushining, bu döwlet bilen Yawropa birliki otturisidiki munasiwetlerning tereqqi qilishidiki eng chong tosalghularning biri ikenlikini, Nezerbayefning Qazaqistanni qanun – tüzüm bilen emes, belki dektatorluq tüzümi bilen idare qilip kéliwatqanliqini bayan qilishmaqta.

Bolupmu Qazaqistandin gherip ellirige siyasi panahliq tilep kelgen Uyghurlar, Qazaqistan hökümitining siyasi, iqtisadi we ijtimayi jehettin buyerde yashawatqan Uyghurlargha 2 – derijilik gerejdanliq mu’amilisi yürgüzüp kéliwatqanliqini, hazir Qazaqistanda < Chong qazaqchiliq > idiyesining küchüyüp beriwatqanliqini we buxil milletchilikni Qazaqistan hökümitining astirttin qollap beriwatqanliqini, Diniy etiqat erkinlikiningmu nahayiti zor besimgha uchrap kéliwatqanliqini, bolupmu < Shang hai hemkarliq teshkilati > qurulghandin buyan, Qazaqistan hökümitining Xitay hakimiyiti bilen éghiz – burun yaliship, köpligen Uyghur siyasi qachqunlargha ziyankeshlik qilghanliqini, xéli köp Uyghur siyasi qachqunlarni Xitaygha tutup bérip, ularning bigunah halda ölüp kétishige sewepchi boliwatqanliqini bayan qilishmaqta.