Yawropa Birlikining Xitaygha Qaratqan Siyasiti Özgürüshke Bashlidi

< Gérmaniye dolqunliri > radiosining xewer qilishiche, Yawropa birlikining Xitaygha qaritip kéliwatqan siyasiti peydin – pey özgürüshke bashlighan. bolupmu Yawropa birliki tashqi ishlar komutétining komisseri Benita Ferero – Waldner xanimning ötken hepte Xitaygha qilghan ziyariti jeryanidiki qattiq ipadisi, Yawropa birlikining Xitaygha qaratqan siyasitining ilgiriki yumshaq halettin qattiq haletke ötkenlikining roshen ipadisi hisaplinidiken.

Bu qetimqi ziyaret jeryanida Benita xanimning Xitay rehberliri bilen ötküzgen söhbetliridé kishilik hoqoq, bazar riqabiti, bilim we patént hoqoqi … qatarliq xéli köp mesililerde Xitayni qattiq eyipligenki, Germaniye metbu’atliri teripidin, < Yawropa birlikining parawuzi hisaplanghan ilgiriki Germaniye we Firansiye hökümetlirining Xitaygha qaritip keliwatqan hemmige bash egish siyatinining xatime berilishi > dep qaralmaqta we Germaniyening hazirqi bash ministiri Merkel xanimning Xitaygha qaratqan siyasitide Yawropa birlikining menpe’etlirini asas qilghan yéngi bir dewirning bashlanghanliqi qeyt qilinmaqta.

Germaniye metbu’atlirida yene, kishilik hoqoq mesiliside Xitayda héchqandaq bir ilgirleshning bolmighanliqi we Xelqaraliq kishilik hoqoq teshkilatliriningmu bu jehette xitayni izchil türge eyiplep keliwatqanliqi bayan qilindi.