Sherqiy Türkistandiki Xitay Emeldarliri Arisida Xiyanetchilik we Parixorluq Ehwalliri Éghir

< Xinjiang geziti > ning 1 – ayning 27 – künidiki xewiride körsütülishiche, < Aptonom rayonluq partikom > ning sekritari Wang Lequan, undin ikki kün burun chaqirilghan, < Aptonom rayonluq intizam tekshürüsh komuteti > ning 2 – nöwetlik omomiy yighinida qilghan sözide, nöwette Sherqiy Türkistanda ammining eng küchlük inkasini qozghawatqan hadisilerning, rehbiri kadirlar ichide omomning puligha mehman chaqirip, chong yep, chong ichish, esli ölchemdin yuquri öylerde we mashinilarda olturush, qimarwazliq qilish we jez qilish, öy setiwalghanda, hoqoqigha tayinip turup bazar bahasidin nahayiti töwen bahada setiwelish yaki nachar öyni esil öylerge almashturiwelish, uruq – tuqqan we bala – chaqilirigha normal bolmighan yollardin menpe’et saqlash, hökümet teripidin bezi türlerge meblegh sélinghanda, iqtisadi körsetküchlerde köz buyamchiliq qilish, karxanilarda islahat élip barghanda öz nepsige chogh tartip, döwlet mélini özining qiliwélish … qatarliqlardin ibaret ikenlikini, yene shundaqla, pul – mal yighiwélish meqsidide, toy – tökün, nezir – chiraqlarning dayirisini heddidin tashqiri kengeytiwetish ehwalliriningmu ammining küchlük inkasini qozghawatqan mesililerning biri ikenlikini tekitlep ötken.

Köpchilikke melum bolghinidek, nöwette Xitayning ichki ölkiliridiki we chetellerdiki bezi metbu’atlarda, Wang Le Quanning nahayiti chong bir xiyanetchilik we chiriklik dilosigha chitilip qalghanliqi bayan qilinip kélinmekte, emma qiziq yeri, birnechche kündin buyan Wang lechuan yighinlarda qilghan sözide, Parixorluq, Xiyanetchilik we Chiriklikke qarshi turush sho’arini kötürüp chiqip, xuddi özini < pak we diyanetlik > kadirlarning bashlamchisi qilip körsütüshke tiriship kelmekte.