Rabiye Xamingha Qaritilghan Iqtisadi Töhmetlerning Siyasi Arqa Körünüshi

("Sherqiy Türkistan Informatsiyon Merkizi"ning mexsus mulahizisi )

Yéqinqi mezgillerdin buyan Xitay hakimiyiti milliy rehbirimiz Rabiye xanimgha qaratqan hujumlirini pilanliq we sestimiliq halda tedriji ashurup kelmekte. Buxil hujumlar, Xitay tashqi ishlar ministirliki, Xitayning Sherqiy Türkistandiki partiye – hökümet organliri, shundaqla Xitay hakimiyitining konturolliqidiki herqaysi ichki – tashqi teshwiqat wastiliridin ibaret 3 leniye boyiche élip bérilmaqta we bu 3 leniyening telebbuzi bir – birige zich maslashqan.

Emma diqqet qilidighan bolsaq, Xitay hakimiyitining Rabiye Qadirgha qaratqan hujumlirida, iqtisadi jehettiki töhmetlerning xéli éghir salmaqni igellewatqanliqini körüwélish tes emes. Emma Xitay hökümiti teripidin bu heqte élan qiliniwatqan axbarat we bayanatlarning mezmonigha qaraydighan bolsaq, Xitayning Rabiye xanim we unung perzentliri üstidin toqup chiqilghan iqtisadi töhmetlerning pütünley asassiz we mentiqisiz ikenlikini, Xitayning buyerde peqetla Rabiye xanimning Uyghurlar ichidiki izzet – abroyini yerge urush we Rabiye xanimning weten ichidiki iqtisadi menbelirini pütünley qurutushni meqset qilghanliqini körüwélish tes emes, yeni Xitay hökümiti tamamen siyasi jehettin öch élishni meqset qilghan.

Mesilen, Sherqiy Türkistanda Xitay hökümiti teripidin bashquruliwatqan we eng asasliq axbarat wastilirining biri hisaplanghan < Titanshan tori > da yéqinda mexsus bir sehipe echilghan bolup, sehipining nami, < Xinjiang saqchiliri Sherqiy Türkistan térorchilirining meshiq bazisini bit – chit qilip, téroristlarni étip öltürdi > din ibaret.

Bu sehipige, Uyghurlarning milliy herikiti qarilanghan 30 parchidin artuq xewer – uchur orunlashturulghan bolup, sehipining ichige yene, < Sherqiy Türkistanchilar we Rabiye > digen temida ayrim bir sehipe qoyulghan we bu mexsus sehipige, Rabiye xanimgha hujum qilinghan bezi axbarat, bayanat we xewer – uyhurlar yerleshtürülgen bolup, bularning hemmiside digüdek iqtisadi jehettiki töhmetler asasliq salmaqni igelligen.

Bu sehipide yer alghan < Xitay axbarat tori > ning 1 – ayning 7 – künidiki xewiride körsütülishiche, Rabiye xanim we unung perzentliri 1994 – yilidin, 2004 – yilighiche 8 milyondin artuq baj oghrilighanmish, tölimigen qerzi 20 nechche milyon yüanmish, hemmisini qoshqanda, Rabiye xanimning 28 milyon yuandin artuq qerzi bamish!

Emiliyette bolsa, 1995 – yili Xitay metbu’atlirida Rabiye xanimning meblighining 200 milyon yüange yetkenliki, Xitaydiki baylarning ichide 8 – orunda turidighanliqi we Sherqiy Türkistan boyiche < eng bay ayal > gha aylanghanliqi yer alghan, Xitay hökümitimu eyni chaghda bu heqte keng – kölemde teshwiqat élip barghan, shu mezgillerde Rabiye xanim < Aptonom rayonluq siyasi kengesh > we < memliketlik siyasi kengesh > ning ezasi idi. Yene kélip shu mezgillerde Xitay hökümiti yene Rabiye xanimni < halal emgikige tayinip beyighanlarning ülgisi > süpitide, < memliketlik 8 – mart bayraqdari > qilip saylash bilen birge, BDT ning Beijingda chaqirilghan < Dunya ayalliri Qurultiyi > ning wekili qilip körsütüp bergen idi.

Yene kélip, Rabiye xanim 2003 – yili 3 – ayning 10 – küni Ürümchi ottura sot mehkimisi teripidin 8 yilliq qamaq jazasigha höküm qilinghandimu, < Döwlet mexpiyetlikini ashkarilighan > digen guna artilghan, iqtisadi jehettin hech qandaq bir eyiplesh yoq idi.

Emma, eyni chaghda Rabiye xanimdin iqtisadi jehettin hechqandaq qusur tapalmighan Xitay hökümiti, 2005 – yili 3 – ayda Rabiye xanim türmidin chiqip dawalinish sewebi bilen Amerikigha chiqip ketkendin keyin, bolupmu Rabiye xanim chetellerde Uyghurlarning milliy herikitige pa’al türde qatnishishqa bashlighandin keyin, tuxumdin tük ündürüp, bir talay saxte < délil – ispatlar > ni oydurup chiqirip, Rabiye xanim we perzentlirini iqtisadi jinayetchi qilip körsütüshke tiriship keldi.

Rabiye xanim chetelge chiqip 5 aydin keyin, yeni, 2005 – yili 8 – ayda, < Aptonom rayonluq partikom > ning sekritari Wang lechuan Bei jingdiki axbarat élan qilish yighinida qilghan sözide, < Rabiye chetelge chiqiwélipla özgüriwaldi, hazir u, cheteldiki téroristlar, bölgünchiler we radikal küchler bilen birliship, Zhungguoni parchilash heriketliri bilen shughulliniwatidu, shunung bilen birge yene, weten ichidiki perzentlirini barliq mal – mülüklirini neqpulgha aylandurup chetelge élip chiqip kétishke ündewatidu > diyish arqiliq, Rabiye xanimdin siyasi jehettin öch alidighanliqining tunji bisharitini bergen we buxil öch élish herikitini aldi bilen unung perzentliridin bashlaydighanliqini éniqche ipade qilghan idi.

Digendekla 2005 – yili 6 – ayning 1 – küni Xitay saqchiliri Rabiye xanimning perzentliridin Alim Abdurehim, Ablikim Abdurehim we Roshengül Abdurehimlerni tutqun qilip nazaretke alghan we ulargha < iqtisadi jinayetchi > digen qalpaqni keydürgen idi. Shunung bilen birge yene Xitay metbu’atliri, < Rabiyening perzentliri 200 ming dollardin artuq pulni chetelge yötkigen > digen xewerni yéyish arqiliq, özlirining bu iqtisadi töhmetlirini heqliq chiqirishqa tirishqan idi. Emiliyette bolsa Xitayning bu qilmishi, 2006 – yilliq nobel ténchliq mukapatigha namzat qilip körsütülgen we yene < Amerika Uyghur Birleshmisi > ning reyislikige saylanghan Rabiye xanimgha qaratqan wastiliq öch élish herikiti idi.

Rabiye xanim < Dunya Uyghur Qurultiyi > ning reyislikige saylinip bir kündin keyin, yeni 2006 – yili 11 – ayning 27 – küni Xitay sot mehkimilirining Rabiye xanimning oghli Alim Abdurehimni iqtisadi töhmetler bilen 7 yilliq qamaq jazasigha höküm qilghanliqimu, Xitay hakimiyitining öch élish muddasini ochuqche körsütüp bergen idi.

Xitay hakimiyitining buyerde yetmekchi bolghan meqsidi, Rabiye xanimning perzentlirini jazalash arqiliq hem Rabiye xanimgha tenbih bérish, hem Rabiye xanimning wetendiki iqtisadi menbelirini pütünley qurutup tashlash, hem shundaqla Rabiye xanimning Xelqimiz ichidiki kündin – künge yuquri kötüriliwatqan izzet – abroyini chüshürüshtin ibaret idi.

Emma, nöwettiki ichki – tashqi weziyetke qaraydighan bolsaq, Xitay hakimiyitining yuqarqi meqsetlirining héch birige yetelmigenlikini, Rabiye xanimni < sesitimiz > dep, özlirini sésitiwalghanliqini körüwélish tes emes. Chünki pütün chetel metbu’atliri we xelqaraliq kishilik hoqoq teshkilatliri, Xitay hakimiyitining Rabiye xanimgha we unung perzentlirige qaritip kéliwatqan iqtisadi töhmetlirini, < tamamen gherezlik halda élip bériliwatqan Siyasi jehettiik öch élish hérikitidin ibaret ! > digen nuxtida birleshmekte ! .