2006 – Yili Sherqiy Türkistangha Poyez Bilen Élip Kirilgen < Paxtichi > Xitaylarning Omomiy Sani Bir Milyondin Artuq

< Xinjiang xelq radio istansisi > ning 1 – ayning 22 – künidiki xewiride bayan qilinishiche, 2006 – yili, Ürümchi tömüryol idarisi teripidin ichkiri ölkilerdin poyez bilen yötkep kélingen < paxtichi > Xitaylarning omomiy sani 1 milyon 50 neper bolup, ularning birnechche ay ichide paxta terip tapqan pulining omomiy miqdari eng az bolghandimu 2 milyart yüange yétidiken.

Ichkiridin kelgen < paxtichi > Xitaylar, Ötken bir yilda Sherqiy Türkistanda paxta yighiwélishqa qatnashqan kishilerning omomiy sanining 75 pirsentini teshkil qilghan bolup, ichkiridin élip kélinip < Bingtuan > ge teqsim qilinghan < paxtichi > Xitaylardin 420 ming kishi mexsus ishchilar uyushmisigha qobul qilinghan.

2006 – yili Sherqiy Türkistangha < paxtichi > Xitaylarni yötkep kélish üchün, 9 ölkige qarashliq tömüryol idariliri jem’i 271 qétim mexsus poyez sepiri orunlashturghan. Emma, < paxta terish > digen namda kelgen bu Xitaylarning qanchisining qélip, qanchisining ketkenliki namelum.

Sherqiy Türkistanda Uyghur dehqanliri üchün terilghu yer yétishmey, köpligen dehqanlar ish izdep bashqa yurtlargha, hetta Xitayning ichkiri ölkilirige élip kétiliwatqan bügünki künde, Xitay hökümitining < paxta terish > digen namda milyonlighan Xitayni sherqiy türkistangha yötkep kélishi, yerlik xelqning naraziliqini qozghimaqta.

Bezi Uyghur siyasi küzetküchiler buni, < Xitayning pilanliq we meqsetlik halda élip beriwatqan köchmen yötkesh siyasitining mohim bir parchisi > dep qarimaqta.