< Jidde Radiosi Uyghurche Bölümining Taqiwetilgenlikidin Sawaq Élishimiz Lazim ! >

< Sürette: Abduljelil Qaraqash, Jidde Radiosi Uygurche bölümining muxbiri Muhammet Yüsüf efendim bilen >

Bezi xewerlerde körsütülishiche, buyil 1 – ayning 18 – küni, Saudi erebistanning Jidde Radiosi köp yillardin buyan mexsus Uyghurche anglitish berip kéliwatqan Uyghur bölümini taqiwetken.

Jiddi Radiosi Uyghurche bölümining taqiwetilgenliki, chetellerda yashawatqan Uyghurlar arisida küchlük inkas qozghidi. Birnechche kündin buyan bezi Uyghur teshkilatliri we Uyghur jama’etliri, Saudi hökümitige we özliri turushluq döwletlerdiki Saudi erebistan elchixanilirigha murajetname yollap, Saudi hökümitining bu qararidin qattiq epsuslanghanliqini bildürüsh bilen birge, ulardin Jidde Radiosining Uyghurche anglitishini dawamlashturushni telep qilishmaqta.

80 – yillarning bashlirida, Amerikining Germaniyediki < azat radiosi > mu, özining 60 – yillardin buyan anglitish berip kéliwatqan Uyghurche bölümini taqighan, Uyghurche bölümde ishlewatqan xadimlar Özbekche we Tajikche tillarda anglitish beridighan bölümlerge qaydurulghan idi.

1998 – yili Amerika < Erkin Asiya Radiosi > teripidin yene mexsus Uyghur bölümi tesis qilinip, hazirgha qeder künde bir sa’et Uyghurche anglitishni yolgha qoyup kelmekte.
Saudi erebistandiki Jidde Radiosining Uyghurche anglitishi, Diniy purogrammilarni asas qilidighan we Sherqiy Türkistan heqqidiki türlük xewer – uchurlarnimu qoshumche beridighan mexsus anglitish bolup, unung purogrammiliri Uyghur xelqining qizghin alqishigha eriship kelgen idi.

Bash shitabi Germaniyediki < Sherqiy Türkistan Informatsiyon Merkizi > ning Pirezidenti Abdujélil Qaraqash ependi, Jidde Radiosi Uyghurche bölümining taqiwetilgenlikige qarita özining qarshlirini bildürüp mundaq didi:
< Men, uzun yillardin buyan özimizning musteqil teshwiqatimizni kücheytishni tekitlep kéliwatimen, teshwiqat – bizning milliy herikitimizning jan tomuri, shunga biz teshwiqat jehette chetel döwletlirining teshwiqat wastilirigha béqinip qalsaq bolmaydu, dunyadiki döwletlerning munasiwetliride her zaman özgürüsh bolup turidu, herqaysi döwletlerning Uyghurlar mesilisi heqqidiki pozitsiyesimu, shu döwletlerning Xitay bilen bolghan munasiwetlirining tereqqiyatigha mas halda özgürüp turiwatidu, mesilen, kéyinki 10 yilda Rusiyediki bezi Uyghurche teshwiqat organliri, yene bizge xoshna bolghan bezi ellerdiki Uyghurche teshwiqat wastilirimu Xitayning bésimi bilen taqiwetildi, eyni chaghda Uyghurlar Amerikining Germaniyediki < Azat Radiosi > ning Uyghurche bölümigimu zor umid baghlighan idi, 80 – yillarning bashlirida Xitay rehbiri Ding Xiaoping Amerikini ziyaret qilip uzun ötmeyla, < Azat Radiosi > ning Uyghurche bölümi taqiwetildi. Mana emdi Jidde Radiosining Uyghurche bölümimu taqiwetiliptu, biz bulardin sawaq élip, aldi bilen özimizning biwaste bashqurushidiki teshwiqat wastilirini kücheytishke we zoraytishqa ehmiyet bérishimiz kérek. Teshwiqat jehettiki yetekchi idiyeni hezgizmu chetel axbarat wastilirining qoligha tutquzup qoymasliqimiz lazim, biz, xelqimizge qaritilghan teshwiqatning yetekchi diyesini özimiz sharayitqa we xelqimizning éhtiyajigha qarap békitishimiz we özimiz konturol qilishimiz kerek ! >.
Abdujélil Qaraqash ependi yene tekitlep mundaq didi:
< Nöwette chetellerdiki Uyghur teshkilatlirimiz teripidin bashquriliwatqan teshwiqat wastilirimiz nahayiti ajiz bir weziyette turiwatidu, xelqimizning éhtiyajini qamdashtin tolimu yiraq, bundaq bolushining sewebi shuki, yillardin buyan bezi teshkilat we shexislirimizning milliy teshwiqatimizning ehmiyiti we qimmitige bolghan chüshenchisi tolimi yüzeki bolup, ular milliy teshwiqat wastilirimizni qollash we tereqqi qildurushtin özlirini qachurup keldi, hetta beziliri bilip – bilmey tosalghuluqmu qildi, netijide, xelqimizge qaritilghan teshwiqatimizning yölünishini we yetekchi idiyesini chetel teshwiqat wastiliri bekitip beridighan we shular konturol qilidighan weziyet otturigha chqishqa bashlidi, bu, milliy herikitimizning kelgüsi tereqqiyati üchün tolimu xewiplik, elwettiki, chetel axbarat wastilirining Uyghurche anglitishni yolgha qoyghini biz üchün tolimu paydiliq bir ish, emma, künlerning biride ular bezi siyasi we déplomatik sewepler bilen tuyuqsiz taqilip qalghanda, bizning qolimizdimu özimizning éhtiyajini melum derijide qamdiyalaydighan mexsus teshwiqat wastisi bolushi lazim ! >.