Xitay Eskirining Jeset Küli Yurtigha Qayturuldi, Bizning 18 Neper Shehidimizning Na’ashi Nede ?

< Tianshan tori > ning xewer qilishiche, yéqinda Aqtuning Kosrap yézisi teweside yüzbergen qoralliq toqunushta musteqilliq jengchiliri teripidin étip öltürülgen Huang Qiang isimlik Xitay eskirining jestet küni, 1 – ayning 13 – küni Ürümchide 800 saqchining qatnishishida ötküzülgen heshemetlik murasimdin kéyin, Huang Qiagnning uruq – tuqqanliri teripidin yurti Sichuan ölkisining Cheng Du shehrige élip kétilgen.

Sichuanning Partiye, Hökümet we Armiye mesulliri Cheng Du ayrupilan istansisida 10 ming kishilik murasim bilen Huang Qiang isimlik Xitay eskirining jeset külini qarshi alghan.
Huang Qiangning jesidi Ürümchide köydürülgen idi.

Birqanche kündin buyan Sherqiy Türkistandiki pütün Xitay metbu’atliri bu Xitay eskirining ish – izlirini jenining beriche teshwiq qilmaqta. Unung üstige < jama’et xewipsizlik nazariti > ning pütün saqchilargha chiqarghan < Huang Qiangdin ögünüsh chaqiriqi > din sirt yene < Aptonom rayonluq ittipaq komutéti > we < Aptonom rayonluq yashlar birleshmisi > mu uxturush chiqirip, pütün yashlarni Huang Qiangdin ögünüshke chaqirghan.
Weqedin buyan Xitay hökümitining bu qétimqi toqunushta shehit bolghan 18 neper uyghurning jesidining aqiwiti we bularning kimliki heqqide hechqandaq uchur bermigenliki, chetellerde yashawatqan uyghurlarni qattiq ghezeplendürmekte.

Germaniyediki < Sherqiy Türkistan informatsiyon Merkizi > ning pirezidenti Abdujélil Qaraqash ependi bu heqte özining qarashlirini bildürüp, < bu hadise, Xitay tajawuzchilirining neziride uyghurlarning hech bir qedir – qimmitining yoqluqini chüshendüridu, Amerikining konturolliqidiki Iraq hökümiti jenida Saddam Hüseyinning jesidini ayilisige tapshurup berdi we unung jinaze namizining ochuq – ashkare halda chüshürülishige yol qoydi, meyli sewebi nime bolushidin qetinezer, öltürülgen bir insanning jesidini ayilisige tapshurup berish we unung depne qilinishigha yol qoyush bolsa insanliq we kishilik hoqoqning eng eqelli bir qayidisi, dimek, Xitay tajawuzchilirining bu weqede tutqan pozitsiyesi, bu hakimiyetning hech bir insaniyetchilikining yoqluqini chüshendürüp beridu > dep körsetti.

Abdujélil Qaraqash ependi Xitay eskiri Huang Qiang heqqide toxtulup, < bu qétimqi toqunushta ölgen Xitay eskiri bolsa, Sherqiy Türkistanni ishghal qilip turiwatqan mustemlikichi bir armiyege mensup eskerdin ibaret, Sherqiy Türkistandiki Xitay mustemlikichilirining aqwiti choqum Huang Qiang digen bu eskerningki bilen oxshash bolidu, tarixtin buyanmu shundaq bolup kelgen ! Xitay hakimiyitining Huang Qiangdin ögünüsh kampaniyesi bashlishidiki tüp meqsidi, Sherqiy Türkistandiki mustemlikichi küchlirini jasaretlendürüsh, yerlik xelqni teximu rehimsizlerche qirghin qilishqa teshwiq qilishtin ibaret, Xitay mustemlikichiliri elwette Huang Qiangdin ögünidu, bunung heyran qalghudek yeri yoq, emma Sherqiy Türkistan xelqi bolsa özining 18 neper söyümlük batur oghlanidin ögünidu, ularning öz xelqining hörliki, wetinining musteqilliqi üchün qimmetlik hayatini teqdim qilishtek esil pezilitidin ögünidu we ularning küreshchan rohini menggü yashnitishqa tirishidu ! > dep tekitlidi.