Rabiye Xanimning Resimi Tunji Qétim Sherqiy Türkistandiki Xitay Metbu’atlirida

Sherqiy Türkistanda Xitay hökümiti teripidin bashquruliwatqan < Tianshan tori > da, < Dunya Uyghur Qurultiyi > ning reyisi we Uyghurlarning meniwiy anisi Rabiye Qadir xanimning Amerikida tartilghan bir parche resimi yer aldi. Bu, Rabiye xanim chetelge chiqqandin buyan, tunji qétim unung resimining Sherqiy Türkistandiki Xitay metbu’atlirida yer élishi bolup hisaplinidu.

< Tianshan tori > da bu resimning orunlashturulush sheklige qaraydighan bolsaq, Xitay hakimiyitining Rabiye xanimni atalmish < terorist > qilip körsütüsh üchün alahide bash qaturghanliqini körüwélish tes emes.

< Tianshan tori > ning mehsus sehipisidiki bu resimlerning birinchi retide, 1 – ayning 5 – küni Aqtudiki qoralliq toqunushta Musteqilliq jengchiliri teripidin étip öltürülgen Huang Qiang isimlik xitay eskirining Depne murasimigha dayir süretler yer alghan bolup, 2 – retide bolsa, bash qismida Rabiye xanimning Amerikigha ayaq basqan küni tartilghan resimi, unung yenida Afghanistandiki Talibanlarning we El – Qaide teroristlirining resimliri yer alghan.
Gerche xitay hökümiti bu resimlerni orunlashturushta < sesitip yoqutush > ni meqset qilghan bolsimu, emma, < Sherqiy Türkistan Informatsiyon Merkizi > ning wetendin igellishiche, Rabiye xanimning jenggiwar we jushqun keypiyatta chüshken bu resimi, chetel metbu’atlirini körüsh imkaniyiti bolmighan Sherqiy Türkistan xelqini nahayiti söyündürgen. Weten ichidiki köpligen Uyghurlar bu resim heqqide bir – birini xewerlendürüp, özlirining söyünüshlirini izhar qilghan.