Özbekistan Kishilik Hoquq Rehbiri Ezemjanni Qolgha Aldi

2006.05.01 RFA

Özbekistan hökümiti düshenbe küni, Özbekistandiki ataqliq kishilik hoquq paaliyetchisi we Özbekistan kishilik hoquq jemiyitining reisi Ezemjan Fermanofni saxtipezlik qilmishi bilen qolgha alghanliqini bildürdi. Lékin fermanofning qollighuchiliri, hökümetning uni siyasiy seweblerdin qolgha alghanliqini tekitlimekte.

Özbekistan ichki ishlar ministirliqining bildürüshiche, Fermanof yekshenbe küni Özbekistanning gülistan shehiride qoymichiliqtin tapqan pulni éliwatqan mezgilde qolghan ilinghan.

Özbekistan ichki ishlar ministirliqi élan qilghan bayanatida, Ezemjan Fermanofning gunahini étirap qilghanliqini tekitlep, kishilik hoquq teshkilatlirining uning siyasiy seweblerdin qolghan élinghanliqi toghrisidiki shikayetlirini ret qildi. Emma, Özbekistan kishilik hoquq jemiyiti düshenbe küni élan qilghan bayanatida, Ezemjan Fermanofning, yéqinda yézip élan qilghan "dozaqdiki déhqanlar" namliq maqalisi tüpeylidin qolgha élinghanliqini bildürdi. Mezkur maqalide Özbekistan hökümitining, Özbekistanning Jizaq rayonidiki paxta tériydighan déhqanlarning hoquqini qandaq depsende qiliwatqanliqi otturigha qoyulghan.

Özbekistan dunyada eng köp paxta éksport qilidighan dölet bolup, hökümet déhqanlarni paxta térishqa zorlap, ularning mehsulatlirini erzan bahada sétiwalidiken.

Özbekistan prézidénti islam kerimof, ötken yili may éyida Enjan shehiridiki hökümetke qarshi naraziliq namayishi Özbekistan hökümiti teripidin qanliq basturulghandin kéyin, Özbekistandiki ammiwiy teshkilatlar we siyasiy öktichi paaliyetlerge qaratqan basturush herikitini téximu kücheytti. (Qanat).