Uyghur Aptonom Rayonining Sékritari Wang Lequan Iranni Ziyaret Qildi

2006.04.18 RFA

Xelqara jemiyet Iran yadro pilanining tereqqiyatidin jiddiy endishe qiliwatqan bir chaghda, Uyghur aptonom rayoni partkomining sékritari Wang Lequan Iranni ziyaret qilip, Xitayning Iran bilen bolghan munasiwitini ilgiri sürüshke zor ehmiyet béridighanliqini bildürdi.

Xitay kompartiyisining Wang Lequan yitekchilik qilghan wekiller ömiki düshenbe küni téhranda Iranning ‏1 ‏- muawin prézidénti Perwiz Dawud teripidin qobul qilindi. Shinxua axbarat agéntliqining eskertishiche, Perwiz Dawud WangLequan bashchiliqidiki Xitay wekiller ömiki bilen junggo - Iran munasiwiti boyiche "chongqur " pikir almashturghan. Lékin shinxua axbarat agéntliqi, ikki terepning qaysi konkrit mesililerde " chongqur" pikir almashturghanliqini tilgha almidi.

Perwiz Dawud WangLequange " Iran bilen junggo nurghun xelqara zor mesililerde oxshash meydangha ige" dep tekitligen. Wang Lequan, Xitay kompartiyisining Irandiki siyasiy partiyiler bilen 4 prinsip asasida munasiwitini ilgiri sürüshke ehmiyet béridighanliqini eskertti. Xitay Iranni nazuk herbiy téxnikilar bilen teminleydighan eng muhim döletlerning biri. Ikki dölet ötken yili sommisi ghayet zor miqdardiki néfit we tebiy gaz hemkarliqi kélishimi imzalighan.

WangLequan we Xitay wekiller ömikining 14 ‏- aprilda bashlanghan ziyariti Iran prézidénti Ahmed Nijat, ötken hepte Iranning qoyuqlandurulghan uran tawlap chiqqanliqini jakarlighandin kéyinla élip bérildi. Iran prézidéntining bayanatidin kéyin amérika tashqiy ishlar ministiri kondiliza rayis, B D T xewpsizlik kéngishini Irangha qattiq qolluq bilen muamile qilishqa chaqirghan. Lékin Iran prézidénti Ahmed Nijat, gherb döletlirining bésimigha bash egmeydighanliqini we Iranning uran tawlashni dawamlashturidighanliqini jakarlidi. Xitay xewpsizlik kéngishining Irangha imbargo qoyushigha qarshi tirejimekte yaki waqitni keynige sozmaqta idi. (Erkin).