Ürümchide, Naxsha Oghrisi Wang Luobingning Wapatini Xatirilesh Paaliyetliri Uyushturuldi

< Xinhua axbarat tori > da xewer qilinishiche, birqanche kündin buyan Ürümchidiki hökümet tarmaqliri türlük paaliyetlerni uyushturush arqiliq, Wang Luobingning wapatining 10 yilliqini xatirileshke bashlighan we hette unung üchün mehsus pochta markisi bésip tarqitilghan.
Bundin 10 yil burun, yeni 96 – yili 3 – ayning 14 – küni Ürümchide 83 yeshida ölgen Wang Luobing, Xitay hakimiyiti teripidin < ataghliq muzikant we sen’etkar > dep nam bérilip, Sherqiy Türkistandiki Xitay köchmenliri ichide yuquri abroy we izzetke erishken biri, emma Sherqiy Türkistan Xelqi ichide ikki sesiq nami bar, biri - < Naxsha oghrisi Wang Luobing >, yene biri - < Naxsha buzar Wang Luobing >.

Wang Luobing isimlik bu Xitayning ömrining tengdin tolisi, Uyghur xelq naxshilirining ahangini oghrilap we buzup Xitaychigha mayil qilish, Uyghur xelq naxshilirining tekistini özgertip, uni kompartiyini medhileydighan inqilawiy naxshigha özgertish, Uyghur xelq naxshilirining ahangini changchililashturup özining qiliwélish bilen ötken, yeni Uyghur xelqining en – eniwiy sen’itining atsimilatsiyelishishide intayin mohim rol oynighan idi.

Eyni chaghda Sidiqhaji Rozi … qatarliq dangliq obzorchi we yazghuchilar arqa – arqidin obzor – maqalilar elan qilip, bu naxsha oghrisining reswayini chiqarghan idi. Mesilen, Wang Luobing, Uyghur xelqi ichide tarqilip yürgen < Qemberxan > namliq naxshini, < Dawanchingliq qiz > dep özgertip, ahangini sel – pella özgertip, bu naxshini özining ijadiyiti qilip körsetken we mushu < ijadiyiti > üchünla nurghun medal we mukapatlargha erishken idi.

Xitay mustemlikichilirining Uyghur xelqini Xitaylashturup yoqutush siyasiti üchün pütün ömrini atighan bu Xitay ölgendin kéyinmu, Xitay hakimiyiti uni yene, < azsanliq milletlerning muzika ishliri üchün öchmes töhpe qoshqan senet ustazi > dep medhilep köklerge chiqirip keldi we her yili unung wapatini xatirilesh paaliyetlirini uyushturup kelmekte.