Eydis Wabasi Sherqiy Türkistan Xelqining Kelgüsi Mewjutliqigha Eghir Tehdit Salmaqta

Xitay hökümitining perwasizliqi, sehiye sahelirining bihotliqi, dawalash we aldini élish ishlirining palech we sewiyesizliki, shundaqla ajritilghan mebleghning yetersizliki … qatarliq amillar, bügünki künde Eydis Wabasining qisqa waqit ichide pütün Sherqiy Türkistangha yeyilishigha sewepchi boldi. Eydis wabasi Sherqiy Türkistan xelqining kelgüsi mewjutliqigha jiddi xewip élip kelmekte.

< Tianshan tori > ning 3 – ayning 8 – küni bergen xewiride körsütülishiche, Sherqiy Türkistanda téxi bundin 8 yil burun bayqalghan Eydis kesili hazir tez sürette yeyilip, Sherqiy Türkistandiki 15 wilayet we 69 nahiyege taralghan. Eydisning Sherqiy Türkistanda tarqilish sür’iti Xitay boyiche aldinqi qatarda turidiken. Bolupmu Ili, Ürümchi we Qeshqerde tarqilish ehwali intayin eghiz bolup, bunung ichide Ilining özidila bayqalghini 3900 nechche kishi bolup, Xitay boyiche aldinqi orunda turidiken. Eydis kesilini yuqturuwalghanlarning 90 pirsenttin köpireki 20 – 40 yash etrapidikiler bolup, köpünchisi yingne bilen zeherlik chekimlik urush we Jinsiy munasiwet jeryanida yuqturuwalghan.
Eydis wirosining Sherqiy Türkistan rayonida bu derijide tez we keng kölemlik tarqilishi, yerlik xelq ichide qattiq ensizlik peyda qilishqa bashlighan.

Nöwette Beijingda < 10 – nöwetlik Memliketlik xelq Wekilliri Qurultiyi > gha qatnishiwatqan Uyghur < wekil > Hesenjan Seley Hoja, merkizi hökümettin bu heqte jiddi tedbir elishni telep qilghan.