8 – Mart Dunya Ayalliri Bayrimi Yéqinlishishi Bilen Hés Qilghanlirim

Reihangül Hupur ( Germaniye )

8 – mart dunya ayalliri bayrimi yeqinlishiwatqan shu künlerde, wujudumni mürekkep tuyghular chirmap aldi.
Insanda bolushqa tegishlik pütün erkinliklerdin we dunyadiki eng ésil maddi imkanlardin behriman bolup yashawatqan yawropa ayallirining chirayliridiki bexit tebessumlirini körgünüm haman, ixtiyarsiz, hemme insaniy qedir – qimmetlerdin mehrum halda yashashqa mejbur qeliwatqan sherqiy türkistan ayallirining échinishliq haliti köz aldimgha namayen bolidu …
Yoldishi yaki perzentliri étip öltürülgen bexitsiz anilarning yürekni lerzige salidighan dat – peryatliri …
Qursighidiki balisi mejburi éliwétilip öz teqdirige tashlap qoyulghan anilarning qansiz we halsiz chirayliri …
Gunasiz tutqun qilinghan oghlining chirayini axirqi qétim körüp qéniwélish niyitide türmilerning igiz tamliri etrapida chögilep yürgen anilarning umidsiz qarashliri …
Xitayning ichki- ölkiliridiki qarangghu bulung – pushqaqlirida ippet nomusini sétishqa mejbur qilinghan sebi qizlirimizning azap bilen jan talishishliri …
Omaq perzentlirini étiz beshigha yatquzup qoyup, hasha meydanlirida tash – taghar yüdüp tipcheklep yürgen japakesh anilarning ghemkin chehrilliri ….
Jaynimazda olturup Hudagha nale qilish hoqoqidinmu mehrum qalghan bichare anilarning kökke qarap ah urushliri …
Qisqisi, yuqarqilarni köz aldimgha keltürsem, kallamda,< nime üchün janabi Allah teripidin yaritilghan bir yer sharida yashawatqan anilarning teghdiri shunche periqliq bolidu ? Sherqiy Türkistan ayalliri bügünkidek échinishliq teqdirge duchar bolghidek nime guna ötküzgen bolghiyti ? Uyghur ayallirining bu échinishliq dirammisigha qachan xatime bériler ? Uyghur ayallirighimu huddi erkin dunya döletliridiki ayallardek erkin, azat, ghemsiz yashash nesip bolarmu ? > digendek soallar peyda bolidu. Gerche hazir özem anilarning heq – hoqoqi hemmidin üstün turidighan Germaniyedek erkin, démokratik bir dölette yashawatqan bolsammu, emma rohim xuddi Sherqiy Türkistan ziminida kézip yürgendek we özemmmu xuddi Sherqiy Türkistan ayalliri tartiwatqan azap – oqubetlerni wujudumda hes qilghandek bolup, yüreklirim lehte – lehte bolup kétidu.
Baliliq chaghlirimda, tarixta ötken qehriman xanim – qizlirimiz heqqidiki xasiyetlik hikayilerni köp anglighan, bolupmu Manju impiratorigha bash egmey, ippitini, wijdanini, imanini saqlap qelish yolida özini öltüriwalghan Iparhan ning yürekni lerzige salidighan kechürmishliri, üch turpanliq 7 qizning Manju – Xitay mustemlikisige qarshi körsetken baturluqliri, Rizwangül … qatarliq xanimlirimizning ikkinchi qétimliq jumhuriyet inqilabi ( 40 – yillardiki ) mezgilidiki Xitay mustemlikichilirige qarshi jengde körsetken we tillarda dastan bolghan qehrimanliq hikayiliri yürügümning chongqur yéridin orun alghan we ulardin her zaman iptixarlinip kelgen idim.
Shunga, Erkin dunya döletliridiki anilarning ehwali bilen Sherqiy Türkistan ayallirining hazirqi échinishliq halitini sélishturghansiri, Uyghur ayallirini bügünkidek qorqunuchluq we échinishliq teqdirge duchar qilghan Xitay mustemlikichilirige bolghan öchmenlikim we ghezep – nepritim shunche urghup tashidu. Mengemge, < uyghur ayalliri qachanmu bu bexitsiz teqdirdin qutular ? > digen soal kiriwélip yürügümni azaplaydu, < zulum we adaletsizlik uzun mezgil put tirep turalmaydu. Huda buyrisa Sherqiy Türkistan xelqimu haman bir küni erkin dunya döletliri qataridin orun élip, Uyghur ayallirighimu erkin, hör we bexitlik bir muhitta yashash nesip bolidu > dep özemge teselli berimen.