Xitay qaytidin Qattiq Zerbe Bérish Herikiti Élip Bérishni Pilanlimaqta

2006.01.26 RFA

Xitay jamaet xewpsizlik ministirliqining aliy derijilik bir emeldari, Xitay hökümitining künséri köpiyiwatqan jamaet tertipini buzidighan weqelerge qarshi qattiq zerbe bérish herikiti pilanlawatqanliqini bildürdi.

Shinxua agéntliqining xewer qilishiche, Xitay jamaet xewpsizlik ministirliqining yuqiri derijilik bir emeldari 25‏- yanwar küni Beijingda ötküzülgen bir yighinida, Xitayning xéli uzundin buyan dawamlishiwatqan ijtimaiy naraziliq heriketlirining xeterlik bir dewrge duch kéliwatqanliqini tekitligen.

U sözide yene, térrorchiliq Xitay üchün eng chong tehdit dep körsitish bilen birge, Xitay bixeterlik xadimlirini térrorluq hujumlirigha qarshi hoshyar bolushqa chaqirghan. Roytérs agéntliqining bildürüshiche, Xitay jamaet xewpsizlik ministirliqi emeldarining yuqiridiki sözliri Xitay hökümitining, Xitayda künséri jiddiylishiwatqan jemiyet muqimsizliqidin qattiq endishe qiliwatqanliqini körsitidiken.

Ötken hepte Xitay jamaet xewpsizlik ministirliqi, 2005 ‏- yili bir yil ichide Xitayda jemi 87 ming qétim topilang, naraziliq we namayish qatarliq jamaet tertipini buzidighan weqelerning yüz bergenlikini ashkarilighan.

Xitay hökümiti yene, Xitaygha qarshi térror tehditining bolupmu Uyghur élidin kélidighanliqini tekitlep, Uyghur élining musteqilliqi üchün küresh qiliwatqan bezi Uyghur teshkilatlirining Afghanistan we Ottura Asiyadiki radikal diniy guruppilar bilen munasiwiti barliqini bildürgen idi. (Eqide)