Qirghizistanning Bishkek Shehride Ataqliq Sen'etkar Nurmuhemmet Tursun Wapat Bolghanliqining Bir Yilliqi Xatirlandi

2006-yili 1-ayning 21-küni Bishkek shehridiki tenterbiye sariyida Uyghur xelqining süyümlük perzenti, ataqliq xelq sen'etkari, kompozitor Nurmuhemmet Tursun wapatining bir yilliqigha béghishlanghan " öchmeydu menggu tembur sadasi" namliq chong tiptiki sen'et kéchiliki ötküzüldi. Bu sen'et kechilikini Qirghizistan Uyghurlirining <Ittipaq> jemiyiti qarmighidiki <Intizar> ansambili uyushturghan bolup, bu kéchilikke yene Almatadiki ataqliq xelq nahshichisi Ayturghan Hesen bashchiliqidiki dangliq sazendiler we nahshichilarmu ishtirak qildi.

Sehnining tor teripige ataqliq kompozitur, el söygen sen'etkar merhum Nurmuhemmet Tursunning chongaytilghan söriti ésilghan, sehnining chorisi rengga-reng güller bilen bizelgen bolup, sen'et süyer Uyghur xelqining özining eziz oghlanigha bolghan cheksiz séghinishi we hörmiti ekis ettürülgen idi.

Almatadin kelgen élanchi qiz sen'et kéchilikining bashlanghanliqini élan qilghanda pütün zaldiki tamashibinlar orunliridin turup, bir minot sukutte turup, merhum Nurmuhemmet Tursungha teziye bildürdi. Arqidinla < intizar > ansambilining sazendiliri heywetlik " tashway " muzikisini orünlidi. Sen'et kechiliki Qirghizistan döletlik televiziye sitansisi teripidin lintigha élindi. Uyushturghuchilarning chüshendürüshiche bu sen'et kéchilikning lintisi Ürumchige ewetilip, u yerde VCD pilastinkisi qilip ishlengendin kéyin, Sherqiy Türkistanning barliq sheherliride tarqitilidiken.

Bu sen'et kechilikige Almatadiki Uyghur teshkilatlirining rehberliridin
Qehriman Ghujamberdi we < Erkin asiya > radiyosining qazaqistandiki muxbiri Abdullah qatarliqlar alahida teklip bilen kilip qatnashti.

Sen'et kéchiliki merhum Nurmuhemmet Tursunning Almatadiki shagritliridin bolghan ataqlaq temburchi Perhat Supiyup orunlighan < ejem > muzikisi, tamashibinlarning qizghin alqish sadaliri ichide ayaqlashti.