Wang Lequan 19 NepeChetellikni "Térrorchiliq" Bilen Eyiblep Tutqanliqini Pash Qildi

2005.10.18

Uyghur aptonum rayonluq partkomning sékritari Wang Lequan, Xitayning bu yil Uyghur élide 19 chetel puqrasini " térrorchiliq" bilen eyiblep qolgha alghanliqini bildürdi. U buni seyshenbe küni Ürümchide ötküzülgen muxbirlarni kütüwélish yighinida éytqan.

Roytirs agéntliqi muxbirining Ürümchidin xewer qilishiche, Wang Lequan " biz bu yil cheteldin Shinjanggha buzghunchiliq qilish üchün ewetilgen 19 kishini qolgha alduq. Ular Shinjang zéminigha kirip bolghiche, ularni derhal tuttuq" dep körsetken. Emma u tutulghanlarning dölet teweliki we millitini ashkarilimighan.

Reutris agéntliqining xewiride éytilishiche, Xitay hökümiti Sherqiy Türkistan döliti qurushni xalaydighan musteqilchilerni "térrorchilar" dep eyiblep, ulargha qarshi tinimsiz heriket élip barmaqta.

Xewerge qarighanda, Wang Lequan muxbirlarni kütüwélish yighinida yene, ataqliq Uyghur kishilik hoquq paaliyetchisi Rabiye Qadir xanimning ehwali we Korlining sabiq sheher bashliqi Mutellip Yüsüpning ölümi mesilisi heqqide toxtalghan.

Wang Lequan, Rabiye Qadir ailisining Xitaydiki qerzini tügetmigiche, uning balilirining chetelge chiqishigha ruxset qilinmaydighanliqini körsetti. Emma u Rabiye Qadir xanimning balilirining shexsiy erkinlikige héchqandaq dexliy- teruz yetküzmigenlikini éytti. Buning aldida Amérika dairiliri, Rabiye Qadir xanimning baliliri we dostlirining bixeterlikidin endishe qiliwatqanliqini bildürgen idi.

Wang Lequan shundaqla Korlining sabiq sheher bashliqi Mutellip Yüsüpning yéqinda özini öltüriwalghanliqini tünji qétim étirap qildi. U, Mutellip dilosining téxi yenimu ilgiriligen halda tekshürüliwatqanliqini, emma uning, ayalining parixorliqigha chétilghanliqi melum bolghandin kéyin, andin özini öltüriwalghanliqining éniqlanghanliqini körsetti.

Korlining sheher bashliqi Mutellip Yüsüp bu yil 9 - ayning axiri ölgen bolup, Xitay metbuatliri uning ölümi heqqide héchqandaq xewer bermigen idi. (Arzu)