Enqerede Xitay we Pakistan Hökümitige Qarshi Namayish Ötküzüldi

Öz xewirimiz. Sherqiy Türkistan medeniyet we hemkarliq jemiyitining teshkillishi bilen 10-ayning 1-küni Istanbul waqti 13:00 – 15:00 kiche Türkiye paytexti Enqerediki Xitay bash elchixanisi we Pakistan bash elchixanisi aldida Xitay tajawuzchiliri we uning gumashtisi Pakistan hökümitige qarshi namayish elip berildi.

Namayishqa Türkiyening Qeyseri, Enqere, Istanbul sheherliridin bolup 400 ge yeqin Uyghur we Türk qerindashlar qatnashti.
Namayishqa Sherqiy Türkistan medeniyet we hemkarliq jemiyiti reisi Seyit Tümtürk, jemiyetning Enqere shobe bashlighi Xeyrullah Efendigil, Türkiye memurilar uyushmisining reisi Birjan Aqyildiz, siyasi partiye rehberliri we yerlik hökümet rehberliri qatnashti.

Enqerediki Xitay bash elchixanisi aldigha 400 ge yeqin namayishchi qollirida kok bayraq, Türkiyening qizil bayraqi we herxil shoarlar yezilghan taxtilarni kötürüp unluk towlap yetip bardi. Xitay bash elchixanisigha namyishchilar toplan’ghandin keyin Seyit Tümtürk, Birjan Akyildiz ependiler tajawuzchi hökümitining Sherqiy Türkistan’gha qilghan tajawuzchiliqi, ishghal qilghandin keyin Sherqiy Türkistan tupraqlirida siyasi heriketler, atom bombisi sinaq qilish, pilanliq tughutni bahane qilip bowaqlarni öltürush qatarliq wastilar bilen 1950-yildin 2005-yilghiche bolghan 55 yil ichide 10 milyondin artuq Sherqiy Türkistanliqni pajielik öltürgenliki, 1-oktebir Beijing we Ürümchide özliirining yuqurida eytilghan “muweppeqiyetliri” ni tebriklesh yüzisidin chong tiptiki merike uyushturghanliqini ghezep bilen eyiplidi.

Namayishchilar Xitay elchixana binasigha xam tuxum etip, Xitay elchixana binasini shaltaq qilip, iplas Xitay hökümitige bolghan naraziliqini we ghezep- nepritini namayen qilishti.

Namayishchilar qollirida xita tajawuzchi, terrorchi hökümitige qarshi Türkche, Xitayche, en’gilizche yezilghan lozunkilarni kötürüshüp, unluk awazda shoarlar towlidi. Xitay bash elchixanisigha Sherqiy Türkistan medeniyet we hemkarliq jemiyiti hemde Türk dunyasi birleshmisi namida ikki qara chembirek teqdim qilindi.
Xitay elchixanisi aldidiki namayish tamam bolghandin keyin namyishchilar 20 minut yol yurup 300 din artuq saqchi bilen bille udul Pakistan bash elchixanisigha qarap heywetlik qiyapette shoar tolap mangdi. Pakistan bash elchixanisi aldida Seyit Tümtürk we Birjan Aqyildiz ependiler Pakistan hökümitining Xitay tajawuzchi, terrorchi hökümiti bilen til biriktürüp Uyghur köchmenlerni terrorluq wastiliri bilen qetliam qilish, sewepsiz qolgha elish, Xitaygha tutup berishtek insan qelipidin chiqqan jinayetlerni dawamlashturup kelgenliki we 7-ayning axirida 6 ayliq bowaqtin 70 nechche yashliq momayghiche oqqa tutup hemde eghir tiptiki qoral bilen 23 neper Uyghurni öltürüp, jinayi pakitni yoqutush uchun jesetleni mexpi bir terep qilip hechqandaq yerde elan qilmighanliqini, diniy qerindishimiz turup Sherqiy Türkistan xelqige düshmenlik qilghanliqini qattiq eyiplidi.Namayish axirida Pakistan bash elchixanisighimu Türk dunyasi uyushmisidin qara chembirek teqdim qilindi.

1-oktebir küni Enqerediki Xitay we Pakistan bash elchixanisi aldida elip berilghan naraziliq namayishini Türkiyediki dolet telewizoni TRT(Türkiye Radio Telewiziyesi, sun’i hemra arqiliq pütün dunyagha xewer tarqitid) ning 1- we 2- qanalliri 1-,2-oktebir künliri xewer qildi, A TV , Erkin Asiya radiosi (RFA) qatarliqlar xewer qildi. Türkiyening “Orta Doghu” (Ottura sherq), “Yengichagh” gezitlirimu namayishni xewer qildi.

Ertekin
Sherqiy Türkistan Axbarat Merkizi
2005-yili 10-ayning 3-küni