Korla Sheher Bashliqi Mutellip Yüsüp Özini Öltüriwalghanmu ?

Sherqiy Türkistan Korla shehrining bashliqi Mutellip Yüsüp tuyuqsiz “özini öltürüwalghan”.

Xitay kommunist tajawuzchiliri musteqil, muqeddes wetinimiz Sherqiy Türkistan jumhuriyitini Rus kommunistliri bilen til biriktürüp, birleshme dölet terrorluqi arqiliq aghdurup tashlap, mustemlike qilip qoshuwaldi we 1955-yili “Xinjiang Uyghur aptonom rayoni” digen haqaretlik nam bilen zulumgha mehkum qildi.

“Uyghur aptonom rayoni”-dep nami özgertilginige 1-öktebir 50 yil bolidu.

Xitay tajawuzchiliri Sherqiy Türkistan tupraqlirida bu 50 yil ichide Xitaylarning tajawuzchiliq, mustemlikichilik, irqiy qirghinchiliqqa qarshi turghan we eqelli insan heqlirini dawa qilghan 500 mingdin artuq Sherqiy Türkistanliqni “siyasi mehbus” digen qalpaqni keydürüp tutqun qildi we pajielik basturdi. 1964-yildin 1999-yilghiche Xitay tajawuzchi hökümiti Sherqiy Türkistandiki Lopnur atom sinaq bazisida 44 qétim yadro sinaq élip bérip 750 ming Sherqiy Türkistanliqning biwaste radiaktipliq nurdin zeherlinip ölushini we yüz minglighan xelqimizning türlük kesellerge giriptar bolushini, hawa, su, tupraqning eghir derijide bulghinishini keltürup chiqardi. 1988-yildin hazirghiche Xitay tajawuzchi hökümiti Sherqiy Türkistanda 9 milyon bowaqni rehimsizlerche mejburi öltürdi. Yüz minglighan anilarni rohi we jismaniy jehettin mejrux qildi we ölüshini keltürup chiqardi.

Xitay kommunist tajawuzchiliri Sherqiy Türkistanni ishghal qilip qorchaq we saxtipez hakimiyet “Uyghur aptonom rayoni” ni qurup, “muqumluqni saqlap” kelgen bu 50 yil Sherqiy Türkistanda 10 milyondin artuq Uyghurni pajielik basturghan 50 yildur.

Aldimizdiki 1-öktebir küni Ürümchi shehride Xitay kompartiyisi merkizi komiteti siyasi biyurusining daimi heyiti Lo Gan, Xitay hökümitining muawin bash ministiri Hui Liangyu bashliq merkez wekilliri Sherqiy Türkistan’gha ilgiri kelgen Xitay kommunistliri emeldarliri, yerlik ghalchilar we bir qisim xelqni toplap daghdughiliq “tebriklesh” murasimi ötküzmekchi.

Bu “tebriklesh murasimi” da nimiler tebriklinidu?
Xitay tajawuzchiliri 1950-yildin 2005-yilghiche 10 milyondin artuq Uyghurni qetliam qilip, bu fashistik jinayetlirini dunya jamaetchilikigin yoshurup qalghanliqini, özige qarshi chiqqan herqandaq Sherqiy Türkistanliqni basturup yoq qilghanliqini, Sherqiy Türkistan’gha bu 50 yil ichide 10 milyondin artuq tajawuzchi Xitay aqqunini köchürüp yerleshtürgenligini, ottura asiyagha herbi kengeymichilik qishtiki muhim eghiz Sherqiy Türkistanni hazirghiche ishghal qilip turalighanliqini, Sherqiy Türkistandiki barliq bayliqlarni Xitaygha yötkep ketishning ongushluq boluwatqanliqini, buning bilen Xitay ichidiki iqtisadning tereqqi qiliwatqanliqini, ottura asiyagha qechip chiqip panahlan’ghan Uyghurlarni u hökümetlerge herxil hililerni ishlitip ötküzüp élip qetliam qilip, weten ichidiki xelqqe tehdit sélish we ümitsizlendürüsh hilisining dawamlishiwatqanliqini tebriklishidu.

2005-yili 1-öktebirdiki bu “murasim” ning bixeterlikige kapaletlik qilish üchün bu yil 5-aydin hazirghiche 10 mingdin köp Uyghurni “ tajawuzchiliqqa, bulangchiliqqa, zulumgha qarshi turush ehtimali bar”- digen guman bilen tutqun qilip türmilerge solap, qattiq qiyin qistaqqa élip, eghir ten jazasi bérip, peqet jinayet tapalmighandin keyin ailisidin eghir jerimane élip xelqimizni iqtisadi jehettinmu eghir weyranchiliqqa mejburlash, Sherqiy Türkistanning barliq sheher- yezilirida tajawuzchi armiye, qoralliq saqchi, jamaet xewpsizlik saqchiliri, mexpi saqchi qatarliq herxil namdiki qoralliq küchlerni, tanka, eghir tiptiki qorallarni seperwer qilip herküni herbi lahet élip bérip Sherqiy Türkistan xelqige tehdit séliwatidu.

Sherqiy Türkistanda 1950-yildin béri élip barghan dölet terrorluqi we qirghinchiliqlarni we bügün élip bériwatqan qirghinchiliq, kollektip tutqun qilish, sewepsiz eghir jerimane élish, Uyghurlarning mal-mulkini musadire qilish qatarliq dölet terrorluqini dunyadin yoshurup qalmaqchi boluwatidu. Axbaratni qattiq kontirol qilip, sirtqa xewer bergen qerindashlirimizni “dölet mexpiyetlikini ashkarilighan” digen böhtan bilen qolgha élip qattiq jazalawatidu.

9-ayning 23-küni Korla sheher bashliqi Mutellip Yüsüp (43 yas, Lopnurda tughulghan) öz öyide ölüwalghan, digen xewerni (Erkin Asiya Radiosidin) angliduq. U rastinla özini öltüriwalghanmu? Yaki Xitaylar süyiqest bilen öltürüwetkenmu? Xitay hökümiti özi üchün xizmet qiliwatqan sheher bashliqining ölüm xewirinimu “dölet mexpiyetliki” qatarida yoshurup, dölet terrorluq sewiyisini barghanseri östürüwatidu.

Tajawuzchilar Ürümchide we Beijingda “tebriklesh murasimi” ötküzidighan 1-öktebir küni pütün dunyadiki Sherqiy Türkistanliqlarning qetliam qilin’ghan milyonlarche qerindishi üchün musibet tutidighan, kommunist Xitaylarning tajawuzchiliqi tüpeylidin muqeddes tupraqlirimizning xojayinliq hoquqidin mehrum qalghan musibetlik kündur.

Cheteldiki Sherqiy Türkistanliqlarni özliri turushluq döletlerdiki Xitay elchixanisi yaki konsulxanisi aldida tajawuzchiliqqa, qirghinchiliqqa qarshi namayish qilish, nutuq sözlesh, barliq teshwiqat wastiliridin paydilinip Xitay tajawuzchilirining jinayetchilirini pash qilishini ümit qilimiz.

Ertekin
2005-yili 9-ayning 29-küni