Wang Lequan, Rabiye Xanimni Térrorluq Paaliyet Uyushturmaqchi dep eyiblidi

Uyghur aptonom rayoni qurulghanliqining 50 yilliqi munasiwiti bilen peyshenbe küni béyjingda ötküzülgen axbarat élan qilish yighinida, Xitay merkiziy siyasiy biyurosining daimiy heyet ezasi, Uyghur aptonom rayonining partkom sékritari Wang Lequan, ataqliq Uyghur paaliyetchisi Rabiye Qadirni chetelde térrorluq teshkilatlargha arilashqan we térrorluq paaliyet oyushturmaqchi bolghan dep eyiblidi.

Wang Lequan muxbirning Rabiye Qadir heqqide sorighan sualigha jawaben bu sözlerni qilghan bolup, u Rabiye Qadirning amérikigha barghandin kéyin, "3 xil küchler" ning rehberliri hemde gholluq térrorchilar bilen körüshüp mexpiy pilanlarni oyushturghanliqini, bolupmu gérmaniyide échilghan dunya Uyghur qurultiyining 2 - Qétimliq yighini waqtida, Uyghur aptonom rayoni qurulghanliqining 50 yilliqi mezgilide térrorluq paaliyetlerni qandaq élish bérish heqqide kéchiche meslihetleshkenlikini bildürdi.

Emma, dunya Uyghur qurultiyining bayanatchisi Dilshat Reshit, Wang léchuenning bu eyibleshlirini ret qilip, dunya Uyghur qurultiyining, Uyghurlarning erkinlikini tinch yol bilen isteydighan bir teshkilat ikenlikini, shundaqla ularning yighinida peqet, kishilik hoquq mesilisining muzakire qilinghanliqini, hergizmu zorawanliq wastilirining tilgha élinmighanliqini tekitlidi.

Dilshat Reshit yene, Xitay hökümitining ezeldin, Uyghur paaliyetchilirining hemmisinila térrorchi dep ataydighanliqini, shundaqla Xitay bundaq qilish arqiliq özini xelqarada térrorchilarning Qurbani dep körsitip, Uyghurlargha qaratqan basturushini heqleshtürüshni meqset qilidighanliqini bildürdi. (Peride)