Wang Lequan, Yéqinda Bir Uyghur Paaliyetchisining Ėtip Öltürülgenlikini Bildürdi

Uyghur aptonom rayonining partkom sékritari Wang Lequan axbarat élan qilish yighinida, düshenbe küni yene bir Uyghur paaliyetchisining Xitay saqchi dairiliri teripidin étip öltürülgenlikini étirap qildi.

Wangning bildürüshiche, Abdullah Qurban isimlik bu kishi aqsudiki Uyghur élining musteqilliqini terghip qilidighan bir teshkilatning bashliqi bolup, u 2000 - Yili 8 - Ayning 7 - Küni kucharda,özini tutqili kelgen saqchilar bilen toqunushup qélip, jamaet xewpsizlik idarisining Xitay bashliqi chéng pinni étip öltürgen.

Wang yene, Abdullah Qurbanning u qétimliq toqunushta qéchip qutulghanliqini, emma uning bashqa hemrahlirining saqchilar teripidin étip öltürülgenlikini bildürdi. Uning éytishiche, shundin buyan Abdullah Qurbanni tutush buyruqi chiqirilghan bolup, bu yil 7 - Ayning 18 - Küni uning téxiche aqsuda ikenliki pash bolghan. Netijide saqchilar 8 - Ayning 22 - Küni u turushluq jaygha basturup kirgen.

Wang Lequan sözide yene, Abdullah Qurbanning saqchilar teripidin bayqalghandin kéyin, özining qol astidiki ikki kishini étip öltürüp, andin saqchilargha qarap oq chiqarghanliqini, shu sewebtin saqchilarning axiri uni étip öltürgenlikini bildürdi.
Emma dunya Uyghur qurultiyining bayanatchisi Dilshat Reshit, Abdullah Qurbanning peqet özini qoghdighan bolushi mumkinlikini eskertti. Saqchilar buningdin sirt yene, yéqinda Abdullah Qurbanning egeshküchiliridin 10 kishini qolgha alghan.

Wang Lequan yighinda yene, Xitay dairilirining hazir aptonom rayon qurulghanliqining 50 yilliqining aldida pütün Uyghur éli boyiche, "3 xil küch" ke zerbe bérish herikitini qattiq yürgüziwatqanliqini bildürdi. (Peride)