Xitay Uyghur Élide Yene Ikki Gaz Turubisi Yasimaqchi

Xitay dairiliri dölitining énérgiye teminatini serxillashturush meqsitide, yéqinda Uyghur élide yene ikki gaz turubisi yasashni qarar qilghanliqini jakarlidi.

Roytérs agéntliqining xewer qilishiche, yasalmaqchi bolghan bu turubilarning her ikkilisi Uyghur élidin bashlinip Xitayning gensu ölkisigiche tutashturilidighan bolup, bularning birini 1800 kilométir uzunluqtiki néfit turubisi qilsa, yene birini 1500 kilométir uzunluqta qilip, uningdin téxi pishshiqlashtin ötmigen xam néfit mangghuzidiken.

Bu ikki gaz turubining qurulush ishlirini Xitay néfitligi öz üstige alghan bolup, deslepki qedemde bu qurulushning pütüp chiqishigha 14 milyard 6 yüz milyon yüen yeni 1 milyard 8 yüz milyon amérika dolliri xirajet kétidighanliqi mölcherlenmekte. Shundaqla bu ikki gaz turubisi kelgüside, Xitay bilen qazaqistan otturisida séliniwatqan chong gaz turubisi bilen tutashturilidiken.
Bu gaz turubilirining, ilgiri rim xandanliqi bilen Xitayni tutashturghan qedimqi ipek yolidiki Uyghur élige sélinishi, Xitayning ottura asiyadiki mol néfit bayliqigha érishishige qolayliq yaritip béridiken.
Xewerde melum bolushiche yene, Xitay dairiliri hazir bu ikki gaz turubisining biridin yiligha 10 milyon tonna néfit, yene biridin 20 milyon tonna xam néfit mangghuzushni pilanlimaqta. (Peride)