Sidneydiki Xinjiangliq “Sherqiy Türkistan Sürgündiki Hökümet”ning Re’is Jumhurliqigha Teyinlendi

Qargha qarghining közini çoqumaydu
-Uygur xelq maqali.

Amerikida 14-sentebir küni sürgündiki Sherqiy Türkistan hökümiti qurulushi bilen, çet’eldiki Xitayçe metbuatlarda bu hökümet toghrisidiki xewerler burmilinip we qarilinip élan qilinmaqta. Meyli Xitayning içidiki gézitler bolsun, meyli Teywendiki, Hongkongdiki, Amerikidiki Xitayçe gézit-jornallarning hemmisi imkaniyetning bériçe Sherqiy Türkistan namini we teshkilatlirini, yéngidin qurulghan hökümetni kemsitip, haqaretlep teshwiq qilish arqiliq özlirining “biterep media” digen saxta niqabinimu her küni digüdek ashkarilap turuwatidu.

Awistiraliyede çiqidighan “Xingdao Bao” (Yultuz arili) géziti 24 - sentebir küni 1-betige “Sidneydiki Shinjangliq “Sherqiy Türkistan Sürgündiki Hökümet” ning reis jumhurliqigha teyinlendi” serlewhilik xewerni basti.
Çong xetliq yuqarqi mawzudin kéyinla “Awistiraliyediki Sherqiy Türkistan jemiyiti élip barghan köp qétimliq namayish “Tibetlik musteqilçilerning namayishi” dep xata tonuldi” digen 2-mawzu yezilghan.

Xewerning dawami mundaq:

Awistiraliyediki Sherqiy Türkistan jemiyitining reisi Exmet Igemberdi 2001-yili Bürkselde özining wetini içide siyasi jinayetçi bolup ziyankeshlikke uçrighanliqini eyitqan idi. Gézitimizning muxbiri 23-sentebir küni uning telefonini internettin izdigen bolsimu tapalmighan, shu seweplik Sherqiy Türkistan jemiyitining reisini ziyaret qilalmighan.
Awistiraliyediki Sherqiy Türkistan jemiyitining paaliyetliri Awistiraliyediki medialarda intayin az sanda xewer qilinghan. Amerika awazi radiosining jenubi Awistiraliyediki muxbiri 1995-yili Exmet Igemberdini ziyaret qilghan, u çaghda Sherqiy Türkistan jemiyiti Sherqiy Türkistanda élip beriliwatqan yadro siniqigha etiraz bildürüsh yüzisidin élip barghan namyishqa Awistiraliyening ikki partiyisining parlament ezasi qatnashqan.

Xitayçe “Wenhuibao” gézitining aldinqi künlerdiki xewirige qarighanda “Sherqiy Türkistan sürgündiki hökümiti” 14-sentebir Amerikining Washin’giton shehride qurulghanliqini jakalighan we muxbirlarni kütiwelish yighini açqan. Yighinda Awistiraliye Sherqiy Türkistan jemiyitining reisi Exmet Igemberdi reis jumhurluqqa, Amerikidiki “Sherqiy Türkistan azatliq merkizi” ning reisi Eniwer Yusup Turani bash ministirlikke teyinlen’gen.

Awistiraliyede Sherqiy Türkistan’gha ayit xewerler intayin az bolup, 1997-yili 5-ayda jenubi Awistiraliyege ziyaretke barghan Xitayning bash ministiri Zhurongjigha qarshi élip berilghan naraziliq namayishigha 150 Sherqiy Türkistanliq qatnashqan,dep xewer qilin’ghan idi. Emma Awistiraliyediki gézitlerde 20 neper Tibetning naraziliq namayishi ötküzgenliki xewer qilin’ghan! Emeliyette jenubi Awistiraliyediki mehmanxanida 5-ayning 25-küni Xitayning Zhurongji bashçiliqidiki 70 kishilik soda wekiller ömigi ziyapet ötküzüliwatqanda 200 ge yéqin Sherqiy Türkistanliq kök bayraqni koturup namayish qilghan,bular bilen bille 20 neper Tibetlikmu bar iken. Awistiraliyening televizor we gézitliride namayish qilghanlarni Tibetlik musteqilçiler dep xewer qilghan.

Awistiraliye hökümiti 2002-yili BDT xewpsizlik kéngishining qarari boyiçe “Sherqi Türkistan” (Sherqiy Türkistan Islam Herikiti) ni we shexslerni tettorçilar tizimlikige kirgüzgen bolup, herqandaq Awistiraliyelikning bu teshkilat bilen hemkarlishishi yaki iqtisadi yardem berishi men’i qilin’ghan. Nöwette “Sherqiy Türkistan” Amerikida sürgündiki hökümet qurdi, uning ustige Awistiraliyilik bu hökümetning reis jumhurliqigha teyinlen’genliki kishilerning diqqitini jelp qilmaqta, bu bezi döletlerning terrorizimgha qarshi turushta “Qosh ölçem” qolliniwatqanliqini körsitip turidu.

“Sherqiy Türkistan”-xelqara terrorçi küçlerning bir qismidur. “Sherqiy Türkistan”- Xitayni parçilashni meqset qilghan terrorçi küç bolup, xelqara terrorluq teshkilati bilen qoyuq alaqe baghlap, Xitay çegrisi içide we Xitaygha xoshna döletlerde köp qetim terrorluq, zorawanliq weqeliri peyda qilip nurghun xadimlarning ölüshi we yarilinishini keltürüp çiqarghan.

Xitayning tashqi ishlar ministirligi bayanatçisi Kongquan : “Sherqiy Türkistan Islam herikiti”- xelqara terrorçilarning bir qismi bolup, Xitay çegrisi içide we sirtida köp qetim terrorluq, zowanliq weqelirini peyda qilghan, rayon bixeterligi we muqumluqigha éghir tehdit salghan-digen.

Amerikining Washin’gitondiki Sherqiy Türkistan küçlirining sürgünde hökümet qurushigha yol qoyushi- Amerika hökümitining terrorluqqa qarshi turushta qosh ölçem qolliniwatqanliqini ipadilep beridu. Xitay terep Amerikining Xitayning biaram boluwatqanliqigha estayidil muamile qilishini ümüt qilidu.

Awistiraliyede çiqidighan Xitayçe “Yultuz Arili Géziti” ning yuqarqi xewiridin körünüp turiduki, Xitay tajawuzçi hökümiti “Sherqiy Türkistan” digen tarixi, jughrapiyiwi we siyasi shereplik namni “Térrorçi” digen haqaretlik süpet bilen almashturup ishlitiwatidu we shu arqiliq Sherqiy Türkistan xelqini pütün dunyagha “Térrorçilar” digen namda haqaretlep teshwiq qiliwatidu.

Çeteldiki 50 neççe Uygur teshkilatlirining hemmisini “Terrorçi” dep qara-qoyuq qarilawatidu, Ottura Asiyada özliri pilanliq peyda qilghan yoshurun öltürüsh, ot qoyush qatarliq terrorluq weqelirini Uygurlargha artip qoymaqçi boluwatidu, xuddi Sherqiy Türkistanliqlar we dunya jama’iti bilmeydighandek. Bu terrorluq weqeliri arqiliq dunya jamaitini aldimaqçi boluwatidu, ularningçe bolghanda Amerikiliqlar ashu yundide yüzini yuyidighan paskina Xitaylardin dötmish.

Amerika Sherqiy Türkistan sürgündiki hökümitini qurushqa yol qoysa, parlament binasidiki zalni eçip berse, qatmu-qat zulum içide irqiy qirghinçiliqqa uçrawatqan Sherqiy Türkistanliqlargha ige çiqsa, “Qosh ölçem qollan’ghanliq”, “Térrorçilargha yardemleshkenlik” bolarmish. Tajawuzçi Xitaylar Sherqiy Türkistanda, Tibette, Içhki Mong’gulda, ottura Asiyadiki musteqil bolghan döletlerde élip beriwatqan san-sanaqsiz terrorluq jinayetliri ziyankeshlikke uçrighan xelqlerning , Amerikining, bashqa döletlerning közidin saqit bolarmish! Xitayning bu qilmishliri perishtilerçe ‘mehribanliq’ mish.

Xitay kommunistik hökümiti 60 milyon kompartiye ezasidin paydilinip, yüz minglighan internet sehipisi, gézit-jornal, televizor, deplomatik dastixanlar, soda-setiq dastixanliri, BDT diki imtiyazi qatarliq barliq wastiliridin paydilinip Sherqiy Türkistan xelqini qarilap bolalmaydu, kün nurini étek bilen tosqili bolmaydu, Sherqiy Türkistanni biz azat qilimiz, musteqil qilimiz, Xitay tajawuzçilirini Sherqiy Türkistandin qoghlap çiqirimiz.

Asiya we dunya tençliqigha, insaniyet medeniyitining tereqqiyatigha tarixtiki musteqil dewirlirimizdek öçmes tohpilerni qoshimiz, xelqimizge, ewlatlirimizgha bext yaritimiz. Xitay tajawuzçiliri xelqimizni we dunyani aldash üçün tang’ghan “Aptonom rayon” dep atalghan üsti oçuq türme tüzümini jehennemge uzitimiz, dunyadiki heqqaniyetçi, tençliqperwer hökümet we xelq bizning heqqaniy küreshlirimizni qollaydu, biz çoqum ghelibe qilimiz! Mana bu Uygur xelqining we Sherqiy Türkistan’gha éqip kelgen Xitaydin bashqa barliq Sherqiy Türkistan xelqining yürek sözidur.

Sherqiy Türkistan Informatsion Merkizi
Ertekin
2004-yili 10-ayning 4-küni