Enqerede Xitay Tajawuzçilirigha Qarshi Namayish Qilindi

Öz xewirimiz. Türkiyediki Sherqiy Türkistan medeniyet we hemkarliq jemiyitining teshkillishi bilen paytext Enqerede 10-ayning 1-küni Xitay tajawuzçilirigha qarshi namayish ötküzuldi.

10-ayning 1-küni hawa oçuq idi, etigen sa’et 5 tila Qeyseri shehridin bir aptuwuz qérindishimiz ariliqni yiraq körmey Enqerediki Sherqiy Türkistan medeniyet we hemkarliq jemiyiti Enqere shöbisining ishxanisigha yétip keldi. Enqere shobe jemiyet bashliqi Heyrullah Efendigil, Abdullalar aldinqi künlerdin bashlap bu künki namayishqa puxta teyyarliq qilghan jidi. Qerindashlar salamlashqandin kéyin awal Xitay elçixanisigha, andin Enqerening merkizi bolghan Qizil ay meydanigha bérip namayish qilish toghruluq qarar hemmeylen’ge yetküzüldi.

Saet 12 :00 de 20 kishi wekil bolup tajawuzçilarning elçilirige berilidighan sowghatlarni élip Xitaylarning niyiti we tüzümige oxshap ketidighan qara derwaziliq Xitay elçixanisigha yétip barduq. 100 din artuq Türk saqçi we saqçi emeldarliri bizning kélishimizni kütüp turghan iken, biz salam berduq, saqçilarmu “merhaba” didi we qol éliship korushti. 20 kishilik namayishçi aldigha bunçiwala kop saqçining kélishi ikki menini bilduretti. Biri, Xitay elçixanisidiki yalghançi deplomatlar we ghalçilarning bixeterlikini qoghdash, yene biri qara niyet Xitay hökümiti bu namayishtin paydilinip, ilgiriki adetliri boyiçe çet’eldiki terrorçi we qara jemiyet ezalirini yallap weqe peyda qilip Uyghurlargha ziyankeshlik qilishi yaki Uyghurlarni qarilashqa “pakit” oydurup çiqirishining aldini élish idi.

Xitay elçixanisi aldida Qeyseridiki Sherqiy Türkistan medeniyet we hemkarliq jemiyiti merkizining bashliqi Seyit Tumtürk kanayni qolgha élip shoar towlashqa bashlidi.Desliwide Xitay elçixanisidiki Xitaylar oghri mushuktek qara derwaza aldigha çiqiship marilashqa idi, Seyit Tumtürkning nutqi axirliship, elçixana derwazisigha yéqinlishishimiz bilen xuddi merhum jumhur bashliqimiz Élixan Tore 1944-yili Ghuljida Xitaylarni teshwirlep “Bürkütke yoluqqan toshqandek” qara derwaza içige, andin binaning içkirisidiki oylirige qéçip kirip ketti. Türkiyede yashawatqan Sherqiy Türkistanliqlar Xitay tajawuzçilirining bayramliq aramini buzghan idi. Elçixanigha Xitaylarning jinayetliri üçün ularni jehennemge uzatqan çaghda berishke tegishlik qara çembirek teqdim qilighan idi, qara çembirekte imzamu bar idi: “Sherqiy Türkistanliqlar”

Wekiller Xitay elçixanisigha élip barghan shoarlar yézilghan taxtilargha mundaq ibariler yezilghan:
“Shinjiang emes, Sherqiy Türkistan! ”, “Rabiye Qadir texiçe zindandimu?”, “Oz wetinimizde insanlardek yashashni telep qilimiz!”, “Sherqiy Türkistanda yürgüziwatqan qanliq basturushni toxtat!”, “Sherqiy Türkistan sergerdan hökümitining Amerikida qurulghanliqini qizghin tebrikleymiz!”, “Xitay komunistliri Sherqiy Türkistan xelqining kishilik hoquqini eghir derijide depsende qiliwatidu!”, “Xitay hökümitining irqiy qirghinçiliqigha etiraz bildurimiz!”, “Xitay tajawuzçiliri Sherqiy Türkistandin yoqalsun !”, “Xitay tajawuzçilirini Sherqiy Türkistandin qoghlap çiqirayli!”, “Xitay hökümiti Sherqiy Türkistanda Uyghurlarning medeniyiti we milliy maaripini çeklewatidu”, “Xitay hökümiti axbaratni kontirol qilip, oz jinayetlirini yoshurushqa uruniwatidu”, “Xitay tajawuzçiliri Sherqiy Türkistanda dolet terrorliqi yürgüziwatidu”, “Terrorçi Xitaylarni Sherqiy Türkistandin qoghlap çiqirayli! ”...

Xitay elçixanisi yenida 4 qewetlik bir aililik binasi bolup, Seyit Tumtürkning jarangliq awazini anglighanlar derhal balikonlirigha çiqiship namayishçilargha nezer tashlighan idi, Sherqiy Türkistan heqqidiki xitaplarni anglighan Türkler özlirini tutiwalalmay koz yashliri qildi we qizghin çawak çélip namayishçilargha medet berdi.

Xitay elçixanisigha qara çembirekni teqdim qilip, qara derwaza aldida tajawuzçilargha xitap qilghandin kéyin elçixanidin ayrilduq.

Enqere shehrining merkizidiki “Qizil Ay” dep atilidighan meydandiki bir jamide hemmeylen jüme namizi oquduq. Namazdin kéyinla namayishqa aldin orunlashturulghan 300 din artuq kishi teyyar boldi, Sherqiy Türkistanning yéqinqi weziyiti toghrisidiki xewerler yezilghan teshwiqat waraqliri jama’etke tarqitip berildi. Qizil aydiki merkizi koçida neççe onlighan mubarek kok bayraq we Türkiyening qizil bayraqliri jewlan qilmaqta idi, kok böre resimi çüshürülgen bayraqmu hazirlanghan idi, ikki kanay bilen Seyit Tumtürk, Heyrullah Efendigil, Zohre we Türk qérindashlar sheher xelqige Sherqiy Türkistan heqqide xitap qildi: “Kommunist Xitaylar, Sherqiy Türkistandin yoqal!”, “Sherqiy Türkistan ebediy Türk yurtidur!”, “Türklerge qol uzatqanlarning qolini sundurimiz!”, “Biz kim?”, “Sherqiy Türkistanliqlarning kishilik hoquqi nede?”, “Sherqiy Türkistanning musteqilliq küreshlirini qollaymiz!”, “Türkler Sherqiy Türkistanliqlar bilen menngu bille küresh qilimiz!”, “Biz Sherqiy Türkistanliqlarning yenida”, “Dinimizni we medeniyitimizni yoqutushqa urun’ghan Xitaylarni yoqutimiz!”…
Oktebirdiki Xitaygha qarshi namayishqa “Anatoliye xewer agentliqi”,“Kanal-7 TV” we bashqa axbarat tarmaqlirining muxbirliri ishtirak qilghan idi
Sheher xelqi Türkiyening qizil renglik ay-yultuzluq bayriqigha shekli putunley oxshaydighan kok bayraqni koturup namayish qilghan Uyghur we Türk qerindashlirigha zoq bilen baqti, hayajanlandi, kok bayriqimizni kötürgenler içide bir munçe hökümet memurliri bar idi, Türkiye dolet memurliri teshkilatining bashliqimu bu namayishqa qatnashti we Seyit Tumtürk, Heyrulla Efendigil, RFA Enqere shöbe bashliqi Erkin Tarimlar bilen qizghin quçaqliship körüshti, Erkin Tarimning ziyaritini qobul qildi.
Xitay tajawuzçiliri Uyghurlarni we Sherqiy Türkistan xelqini yetim korsitishke urunup keldi, bizning dostlirimizni haqaretlep keldi, xelqimizning rohigha zerbe berip keldi.

Dunyada bashqilarning heqqige tajawuz qilghan, qara niyet kishiler yaki kishiler toplimining hoshuqi alça çüshiweridighan ish yoq, bizning kurishimiz heqqaniy küreshtur, awal janabi Allah, andin dunyadiki heqqaniyetçi küçlerning hemmisi digudek bizni qollaydu.
Biz jenimizni tikip, ittipaqliship, murini murige tirep, bir niyet, bir meqsette ortaq we tarixiy düshminimiz bolghan Xitay tajawuzçilirigha qarshi jeng élan qilidighan bolsaq, yéqin kelgüside Sherqiy Türkistan jumhuriyitini quralaymiz we uni güllendüreleymiz!


Sherqiy Türkistan Informatsion Merkizi
Ertekin
2004-yili 10-yyning 3-küni