Xitay Sherqiy Türkistanda Irqiy Qirghinçiliqni Dawam Qilmaqta

Xitay tajawuzçiliri Sherqiy Türkistan’gha iplas qedimini basqan kündin bashlap, Sherqiy Türkistan xelqige xilmu-xil bednamlar bilen ziyankeshlik qilip keldi.

Kommunist Xitay hökümiti aldi bilen Sherqiy Türkistan Jumhuriyitining dahilirini oxshash etiqattiki Rus kommunistliri bilen til biriktürüp 1949-yili 8-ayning 27-küni yalghan “Ayrupilan weqesi” toqup çiqip, emeliyette komunizim terrorluq herikiti arqiliq Moskuwaning türmiside ghaljirlarçe qetliam qildi. Çünki, Sherqiy Türkistan jumhuriyitining Moskuwagha barghan dölet rehberliri Rus we Xitay kommunistlirining beqindisi bolushqa könmigen idi.

Rus kommunistlirining kattibéshi Sitalin ottura Asiyada Islam dinigha etiqat qilidighan, Türk tilida sözleydighan Sherqiy Türkistan jumhuriyitining kök bayraqni jewlan qildurup, Tengri taghliri etigide jarangliq ezan towlishidin ölgidek qorqup, Sherqiy Türkistan jumhuriyitining dahilirini wehshilik bilen öltürüp, arqidinla Mongghuliyening köp qismini öz mustemlikisige aylandurush, Sherqiy Asiyada 450 milyon Xitayni kommunizim étiqadigha köndürüsh niyitide Sherqiy Türkistan jumhuhriyitini Xitay kommunistlirigha hediye qiliwetti! Sherqiy Türkistan xelqi zulumgha mehkum qilindi.

Maozedong bashçiliqidiki Xitay kommunist hökümiti Burhan Shehidi, Seypidin Ezizi qatarliq imani sus, ajiz, shexsi menpe’etni hemmidin elan bilidighan meydansiz satqunlarni qapaqqa solap, ularni Sherqiy Türkistan hökümitining aliy hoquq organlirigha olturghuzup, biçare qiyapetke kiriwalghan tajawuzçi armiyisi “Azatliq armiye” ni Sherqiy Türkistan’gha iwertti. Ezeldin medeniyetlik, qorsighi keng Sherqiy Türkistan xelqi bu séwet kötürüp tézek tergen, yol, hoyla-aramlarni süpürüp aç qorsaq yürgen tajawuzçi armiyige iç aghritip, ulargha nan berdi, axshamliri yatidighan yer we yotqan körpe bergen idi.

Arqidinla, Xitay armiyisi Sherqiy Türkistan’gha yéterlik tajawuzçi armiyisini yötkep bolghandin keyin, Sitalin kommunist gorohi bilen til birikturup Sherqiy Türkistandiki xelqqe qaratqan qanliq basturushni bashlidi. Aldi bilen janabi Allah barawer yaratqan Sherqiy Türkistan xelqini “Terkip” lerge ayridi.

“Zomiger”, “Pomishshik”, ”Bay déhqan”, “Halliq ottura déhqan”, “ottura déhqan”, “Kembighel déhqan”, “Ushshaq burjuaziye”, “Sésiq ziyali” digen siyasi salahiyetler Uygur, Qazaq, Qirghiz, Ozbek, Tatar, Tajik, Tung’gan, Mong’ghul qatarliq Sherqiy Türkistan ziminining heqiqi xojayinlirining serxil kishilirining béshigha téngilip, keng kölemde süyiqestlik teshwiqatlar élip bérilip, ulargha we ularning pütün a’ile ezalirigha ziyankeshlik qilish bashlandi.

Yer we bayliq igiliri “Zomiger“, “Pomishshik”-digen töhmet bilen herqaysi wilayetlerde étip öltürüldi. Bu irqiy qirghinçiliqtin aman qalghanliri meng’gülük qamaq jazasi, éghir jismani emgek jazasigha mehkum qilin’ghandin sirt, barliq mal-mülki Xitay tajawuzçiliri teripidin musadire qilindi. Eqilliq kishilerni, wetenperwerlerni, heqqaniyetni bilgüçilerni türlük töhmetler bilen qolgha élip ziyankeshlik qildi. Yer islahati nami bilen nurghun wetenperwer, tirishçan, mötiwer Sherqiy Türkistanliqni öltürdi we qamidi,ziminlirini, mal-mülkini tartiwaldi.

Uning’gha ulapla “Hemme güller bes-beste éçiliqsh, hemme eqimlar bes-beste sayrash”-namida Sherqiy Türkistandiki adaletperwer, weten söyer ziyali, yurt aqsaqallirining konglidiki naraziliq pikirliri we idiyelirini sözlitip, hayal ötmey ularni tizimlap çiqip, özlirining tughma xarakteri bolghan “wediside turmasliq” pelsepisige asasen öç élishqa we basturushqa bashlidi.
“Yerlik milletçi”, “Çet’elge baghlan’ghan”, “Eksil inqilapçi”, “Xitay kommunist partiyisige qarshi unsur” digendek siyasi töhmetler bilen minglighan Sherqiy Türkistan ziyaliliri, milliy armiye qomandanliqi, baylar, diniy ölimalar we heqiqetni körgüçilerge ziyankeshlik qildi, a’ilisini weyran qildi. Sherqiy Türkistan jumhuriyitini qurghan, Hindistan urushida qehrimanlarçe urush qilghan miliy armiyedin ölgüdek qorqup, 1962-yili uni teltöküs tarqitiwetti we general, ofitsirlerni siyasi töhmet bilen öltürüsh, yeza-qishlaqlargha palash, qoralsizlandurush, ijtimai ornini yoq qilish qatarliq wastiler bilen yoq qiliwetti.

Uning’gha ulapla, Maozedong özidin eqilliq we heqqaniyetçi kishilerning hemmisini öltürüp tügitish üçün “Medeniyet inqilabi” dep atilidighan insaniyet medeniyitige düshmenlik qilidighan siyasi ziyankeshlik herikitini bashlidi.

Bu mezgilde, Xitayning içide nime bolsa bolsun, Sherqiy Türkistan xelqige çekidin ashqan haqaret we yoqitish herikiti élip bardi. Sherqiy Türkistandiki Mong’ghul, Shiwe millitidin bashqa barliq milletler 1000 yildin artuq waqit içide étiqad qilip kelgen mubarek “Qurani Kerim” we hedislerni mejburi toplap köydürdi, xelqimizning medeniy miraslirini köydürdi, ata-ana bilen perzentni bir-birige düshmen qilip körsütüp, eyiplesh, tenqit qilish we ziyankeshlik qilishqa seperwer qildi. Uygurlarning medeniyet miraslirigha yeterlik buzghunçiliq qildi. Yüsüp Xas Hajipning Qeshqer shehrining merkizidiki mubarek maziri we yenidiki mesçitni çéqiwetti, nurghun mesçitlirimizni çeqiwetti yaki çoshqa qotanlirigha aylanduruwetti. Miladidin ilgiriki zamanlardin bashlap Qeshqer shehride “Eski Hisar” dep atilip kelgen sheherni buzup zapas tajawuzçi armiyesi bolghan “Bingtuan” armiyisining binakarliq-qurulush shirkitige biton zawuti qurup berdi. 1000 yildin béri mubarek Islam dinigha étiqad qilip kelgen Türkiy xelqni imanidin waz keçishke zorlidi, imansizliqni teshwiq qildi. Mekteplerde mejburi yosunda komunizim terbiyisi élip bérip, dunyadiki barliq dinlarni inkar qildi. Qarshi turghanlarni bolsa rehimsizlerçe basturdi. Çet’el radiolirini anglashni çeklep, anglighanlarni bayqighan haman tutqun qilip türmilerde öltürdi yaki uzun muddet qamidi.

1980-yillargha kelgende Maozedongning izbasarliri bolghan Dengxiaoping, Jiangzeminler dunyadiki medeniyet, erkinlik, demokratiye düshmini bolghan komunizim éqimining warisliri bolush süpiti bilen yéngi hile-mikirlerni oydurup çiqip, siyasi shamallarni peyda qilip Sherqiy Türkistan xelqini dawamliq basturup keldi.

Rast gepni qilghan Sherqiy Türkistanliq ziyali, tarixçi, sha’ir, edip, deplomat, siyasion, oqutquçi, diniy zat, oqughuçi, déhqan, sodiger, hetta ishçi-xizmetçilergiçe türlük siyasi betnamlar bilen ziyankeshlik qilip keldi.
Kommunist Xitay hökümiti her qétim siyasi shamal peyda qilghanda Sherqiy Türkistan miqyasida neççe minglighan Uygur, Qazaq, Qirghiz, Ozbek, Tatar ziyaliliri, déhqanliri, memurliri, oqutquçi, oqughuçi, sodiger, mal igisi, zimin igisi, toghra yolda mangghuçilar ziyankeshlikke uçrap keldi.

Xitay tajawuzçiliri Sherqiy Türkistanda her yili yengi hilemikirlerni oylap çiqip, xelqimizni siyasi, iqtisadi, medeniy, ijtima’i jehetlerdin qamal qilip, erkinlik, demokratiye, menpe’et yetküzüsh uyaqta tursun, pütkül Sherqiy Türkistan xelqining barliq kishilik hoququlirigha tajawuz qilish bilen bir waqitta, poyizda künige tümenlep tajawuzçi ahalisini Sherqiy Türkistan’gha yötkep çiqip wetinimizning ziminini, bayliqini, siyasi, iqtisadiy, diniy, medeniy, ma’arip, ijtima’i hoquqlirini mejburi tartiwélip, peqet Xitay millitigila paydiliq bolghan siyasi, iqtisadiy we ijtimai’i tüzülmini zorlap ijra qilip keldi.

Sherqiy Türkistan xelqining heqqani pikir, telep, küreshlirini rehimsizlerçe basturdi, hemmila yerde dölet terrorluqi yürgüzdi.

1990-yilliridin keyin, Ottura Asiyadiki Türk döletlirining musteqil bolushigha egiship, Sherqiy Türkistan xelqi Xitay mustemlike siyasitige we zulmigha qarshi küresh élan qildi. Xitay tajawuzçi hökümiti Uygurlarni asas qilghan bu heqqaniy küreshke atlan’ghan barliq Sherqiy Türkistanliqlarni basturush bilen bir waqitta, pütün küçi bilen Sovetler ittipaqini, Amerikini we zulumgha qarshi atlan’ghan Sherqiy Türkistan xelqini jenining bériçe qarilap keldi we dölet terrorizimi arqiliq qanliq basturup keldi.

Her yili Xitaylarning en-eniwi bayramliri, dölet bayrimi qatarliq mezgillerde Xitay hökümiti “Amanliqni saqlash”, “Muqumluqni saqlash”, “Shinjiangning bixeterliginini saqlash”, “Muqumluq hemmini besip çushidu” nami bilen tajawuzçi hökümet üçün ghalçiliq qilghan, Sherqiy Türkistan xelqini basturush we talan-taraj qilishta xizmet körsitip keliwatqan, wijdanlirini it çishliwalghan, heqqaniyettin yiraqlashturulghan, shexsiy menpe’et, hoquq, emel, pul üçün hetta özining ayali, qizlirini özidin yuquri kompartiye memurlirigha solap bérishke teyyar turghan Xitay memurlar we tajawuzçi armiye ofitsirlirining bayram mezgilide xatirjem sesiq haraq içishi, köngül éçishi, pojangza étishi, Rus kommunistlirining sayiside érishken bu asan qolgha kelgen mustemlike tupraqqa dawamliq xojayinliq qilip kelgenliklirini tebriklep ziyapetler ötküzüshige kapaletlik qilish üçün, Xitaylar her yili “Uygurlargha 100 künluk qattiq zerbe bérish”, “50 künluk qattiq zerbe bérish”, “Milliy bolguçilerge qattiq zerbe bérish”, “Qanunsiz diniy unsurlargha qattiq zerbe bérish”, “Milliy bolgunçilerni boshugide ujuqturush”, “Bix halitide ujuqturuwetish”, “Idiologiye sestimisidiki milliy bolgunçilerge qattiq zerbe bérish” qatarliq irqiy qirghinçiliq siyasetlirini uzun yillar dawam qilip, Sherqiy Türkistan xelqining yilikide su içmekte. Qenini shorimaqta, qanliq basturmaqta.

Mana bu-55 yilliq Xitay aptonomiye tüzümining eng tereqqi qilghan haliti we ularning mahiyetliri bolup, “yuksek derijidiki aptonomiye”ni, “Sherqiy Türkistan xelqining turmush sewiyisini östürüsh”ni, “törtni zamaniwilashturush”ni, “milliy kemsitishni azaytish”ni teshebbus qilghan, medhiyiligen we uninggha ishinip xizmet qilghan Burhan Shehidi, Seypidin Ezizi we çeteldiki çeteldiki bir qisim liderlerge bérilgen Xitay tajawuzçi hökümitining emeliy jawabidur, “Aptonomiye”(özini özi idare qilish)ge xata ishinip qalghan Sherqiy Türkistan xelqining yüzige urulghan testektur.

Sherqiy Türkistan xelqi teltöküs musteqilliqni qoligha almighuçe, xelqning erkinlik, demokratiye, kishilik izzet ekram we Sherqiy Türkistanning dölitining izzet ekaramining bolushi mumkin emestur!

Xitay zulmi destidin 1949-yildin hazirghiçe milyonlighan Sherqiy Türkistanliq ottura Asiya arqiliq çet’ellerge qéçip çiqip makanlashti, ular özlirining weten dawasi, hökümet dawasi, kishilik hoquq dawasi, qisqiçe qilip eyitqanda insanlar jemiyitidiki heqqaniy dawalarni dawam qilip kelmekte.

1940-yili merhum alimimiz, tarixçimiz, mujahidimiz, Xitay tajawuzçilirigha qoralliq küresh bilen qarshi turup, Xoten wilayitini azat qilghan merhum Muhemmetimin Bughra ependi “Sherqiy Türkistan Tarixi”-namliq shereplik kitapni yezip çiqip mustemlike, tajawuzçiliqqa qarshi yolni éniq körsitip bergen idi. Hazir 64 yil ötüp ketken bolsimu, Muhemmetimin Bughraning yazghan tarix kitabi bizge musteqilliq yolidiki nurluq mayak bolalaydu. Meyli demokratik Xitay bolsun, meyli kommunistik Xitay bolsun, kimki bizning teltöküs musteqillliqimizni qollimaydiken, etirap qilmaydiken, biz uning’gha qet’i qarshi heriket qilimiz.

Xitay tajawuzçi hökümiti, 2001-yili 9-ayning 11-küni Amerikida yüz bergen terrorluq weqesidin paydilinip Uygur xelqini “terror” nami bilen dunyagha elan qildi we “Sherqiy Türkistan” digen shereplik namimizni dunyagha düshmen qilip körsetmekçi boldi. Sherqiy Türkistanda bolsa, 11-sentebir weqesidin kéyin, hökümet organlirida, partiye yaçéykilirida, shirketlerde, yéza-qishlaqlarda Amerikaning ottura Asiyagha besip kirgenliki, Uygurlarning bölgünçi ikenligi, “Shinjiang” ning Xitayning ayrilmas bir qismi ikenligi toghrisida her heptide neççe qétim siyasi yighin çaqirip, Uygurlargha tehdit sélip, Rusiyening xata qilghanliqini, Amerikining “Qeghez yolwas” ikenligini tekitlep, Xitay kommunistik partiyisining hemme ishlirining toghra” ikenligini pütkül Sherqiy Türkistan miqyasida jar saldi.

Shu kündin bashlap, Sherqiy Türkistanda Uygurlarni basturush herikitini küçeyitti. Her yili “100 künluk”, “50 künluk” Uygurlargha qattiq zerbe bérish, “Qanunsiz diniy unsurlargha qattiq zerbe bérish”, “Milliy bolgunçilerge qattiq zerbe bérish”, “Uygur bölgünçilerning tayanç unsurlirigha qattiq zerbe bérish”, “Idiologiye sahesidiki milliy bolgunçilerge qattiq zerbe bérish” qatarliq bir yürüsh irqiy qirghinçiliq qilmishlirini küçeytip, Sherqiy Türkistan xelqining mustemlike, tajawuzçiliq, zorawanliq, bulang-talang, kishilik hoquqni qoghdash, insaniy izzet-ekramini qoghdash yolidiki barliq heqqani küreshlirini qanliq basturup keldi.

Xitay tajawuzçi hökümiti, içki jehette Sherqiy Türkistan xelqini basturush we tehdit sélish bilen bir waqitta, xelqara jemiyetke özlirining wehshi jinayetlirini yoshurush, ashkara qilghan xelqni qolgha elish, jazalash, öltürüsh qatarliq dölet terrorizimini yürgüzüp kelmekte. Sherqiy Türkistan xelqining musteqilliq kürishi heqqaniy küreshtur, tajwuzçi Xitaylar herqançe urun’ghini bilen xelqimizning küresh iradisini sunduralmaydu, pütün dunya xelqi bizning heqqaniy musteqilliq küreshlirimizni qollaydu, Sherqiy Türkistannni azat qilishqa, musteqil qilishqa xelqimizning imani kamildur !


Sherqiy Türkistan Informatsion Merkizi
Ertekin
2004-Yili 9-Ayning 28-Küni