|
Yawropadiki Türk – Islam Teshkilatlirigha Sherqiy Türkistan Dawasini
Anlitish Kampaniyesi Dawam Qilmaqta
Bash orgini Germaniyening Müchen sherhirige jaylashqan < Sherqiy Türkistan
Informatsiyon Merkizi > bolsa, yillardin buyan Yawropadiki Türk – Islam
teshkilatlirigha Sherqiy Türkistan dawasini tonushturup kéliwatqan eng
asasliq Uyghur teshkilatlirining biri bolup, merkez qurulghan 1996 – yilidin
buyan bu teshkilat her yilli ramazan éyidin taki qurban héytqiche bolghan
mezgil ichide pütün Yawropa miqyasida pa'aliyet élip bériwatqan Türk we
Islam teshkilatliri arisida Sherqiy Türkistan dawasini teshwiq qilish we
Uyghur xelqining dert – elemlirini we echinishliq sadalirini tuyghuzushni
izchil türde dawamlashturup kelmekte.
Yéqinda < Sherqiy Türkistan Informatsiyon Merkizi > ning reyisi Abdujélil
Qaraqash ependining riyasetchilikide, Gollandiye Sherqiy Türkistan Uyghur
Birligi'ning asasliq mes'ulliridin Eysa Qarihajim, Muhemmet Imin ependim …
qatarliqlardin terkip tapqan birleshme teshwiqat héyiti, Gollandiye we
Germaniyening herqaysi sheherlirini aylinip, bu sheherlerde pa'aliyet élip
beriwatqan Türk – Islam teshkilatlirining mes'ullirigha we ezalirigha
Uyghurlarning nöwettiki weziyiti heqqide köp qétim doklat berdi.
< Sherqiy Türkistan Informatsiyon Merkizi > we < Gollandiye Sherqiy
Türkistan Uyghur Birligi > ning mes'ulliridin terkip tapqan bu birleshme
hey’et, 11 – ayning 2 – küni Germaniyening Dortmun shehridiki < Türkiye
Tirabzonluqlar Jemiyiti > ni ziyaret qilip, jemiyet mes'ulliri we ezalirigha
Uyghurlarning nöwettiki weziyiti we Xitay hakimiyitining Uyghurlargha
yürgüzüp kéliwatqan bésim we zulum siyasiti heqqide systimilik doklat berdi.
Tirabzon bolsa, Türkiyening eng chong wilayetlirining biri bolup,
Germaniyede yashawatqan Tirabzonluqlarning sani intayin köp.
Bu birleshme hey’et yene, 11 – ayning 2 – 3 – künliri ayrim – ayrim halda
Türkiye Diniy Ishlar Idarisi teripidin Germaniyening Dortmun shehride
Türkler üchün tesis qilinghan merkez jamiside we Türkler teripidin qurulghan
< UTDE > teshkilatining merkizi ishxanisida Türk – Musulman qérindashlargha
Sherqiy Türkistan mesilisi heqqide mexsus doklat berdi.
Yene shundaqla bu hey’et, Germaniyediki eng chong musulman jamisi
hésaplanghan Duisbrug merkez jamiside uyushturulghan, < Germaniyediki
musulmanlarni hejge uzutush murasimi > gha teklip bilen qatniship,
murasimgha qatnashqan Türk – Musulman qérindashlargha Uyghur musulmanliri
duch kéliwatqan zulum we bésimlar heqqide melumat bérish imkaniyitige
érishti.
Murasim jeryanida Hajilar ömigi ezalirigha, Xitayning Uyghur musulmanlirigha
séliwatqan külpetliri bayan qilinghan mexsus teshwiqat waraqliri tarqitildi.
|
