ETIC Bayanati:
Xitay Élan Qilghan Atalmish < Ikkinchi Türkümdiki Sherqiy Türkistan Terorchiliri Tizimliki > Bolsa, Mahiyette Xelqaraliq Bir Siyasi Aldamchiliqtin Ibaret

Kommunist Xitay hakimiyiti, Amerikida yüzbergen < 11 – sintebir > téror weqesidin buyan, Amerika bashchiliqidiki demokratik ellerning dunya miqyasida qanat yaydurghan xelqara térorizimgha qarshi turush herikitini süyistimal qilip, Uyghur xelqining erkinlik we hörlük üchün élip beriwatqan heqqaniy milliy heriketlirini xelqara siyasi sehnilerde qarilashqa we bu arqiliq özlirining Sherqiy Türkistanda Uyghur xelqighe qarita yürgüzüp kéliwatqan rehimsizlerche qanliq basturush herikitini yolluq qilip körsütüshke urunup kelmekte.

Xitay hakimiyiti bir tereptin weten ichide Uyghurlargha qaratqan dinsizlashturush, xitaylashturush, iqtisadi jehettin talan – taraj qilish, özlirige qarshi chiqquchilarni qanliq basturush we jazalash herikitini kücheytse, yene bir tereptin chetellerde paaliyet élip beriwatqan Uyghur teshkilatliri we Uyghur siyasi paaliyetchiliri heqqide türlük yalghan – yawidaq we saxte délil – ispatlarni toplap chiqip, ularni dunyagha < térorist > yaki < térorist teshkilat > dep élan qilish arqiliq, Uyghur milliy herikitining dunyadiki obrazini xunükleshtürüshke urunup kelmekte.

Köpchilikke melum bolghinidek, 2003 – yili Xitay jamaet xewipsizlik ministirliki, chetellerde paaliyet élip beriwatqan 11 neper uyghur siyasi paaliyetchini we 4 uyghur teshkilatini dunyagha, < térorist > we < térorist teshkilatlar > dep élan qilip, munasiwetlik döwletlerdin bu Uyghur paaliyetchilirini Xitaygha ötküzüp berishni we jazalashni telep qilghan idi.

Emma Uyghur xelqining echinishliq teqdirini we Xitay hakimiyitining Uyghur xelqighe séliwatqan besim we zulumlirini heqiyqi yosunda tonup yetken, shundaqla Xitayning Uyghur siyasi paaliyetchilirini qarilashtiki saxte yüzini körüp yetken dunya jamaetchiliki, Xitayning yuqarqi töhmetlirige pisent qilmighan, netijide Xitay teripidin 2003 – yili élan qilinghan < tunji türkümdiki Sherqiy Türkistan térorchiliri tizimliki > bolsa xelqarada hech bir bazar tapalmay, Xitay hakimiyitining dunya siyasi sehniliride éghir meghlubiyetke uchrishigha we reswa bolushigha sewepchi bolghan idi.

Epsuski Xitay hakimiyiti bu meghlubiyiti we reswachiliqidin qilche sawaq alghini yoq we özlirining Sherqiy Türkistanda élip beriwatqan jinayi qilmishlirini aqlash meqsiside dunya siyasi sehniliride Uyghur milliy herikitini qarilashni dawamlashturup kelmekte.

Bunung yene bir délili shuki, 2008 – yili 10 – ayning 21 – küni Xitay jamaet xeweipsizlik ministirliki yene, < ikkinchi türkümdiki Sherqiy Türkistan térorchiliri tizimliki > ni élan qilghan bolup, bu tizimlikte Memtimin Memet, Emet Yaqup, Tursun Tohti … qatarliq 8 Uyghuning ismi yer alghan.

Xitay hakimiyiti bu 8 neper Uyghurni, Birleshken döwletler teshkilati we Amerika teripidin 2002 – yili 9 – ayda < térorist teshkilat > dep élan qilghan < Sherqiy Türkistan islam herikiti > teshkilatining gholluq ezasi qilip körsetken bolup, Xitay jamaet xewipsizlik ministirlikining bu heqte élan qilghan bayanatida körsütülishiche, bu Uyghurlar Bei jing olimpik yighinining bixeterlikige tehdit sélish jinayiti ötküzgenmish.

Emma Xitay hakimiyiti bu Uyghurlarning Bei jing olimpik yighinining bixeterlikige qandaq buzghunchiliq qilghanliqigha dayir hech bir délil – ispat körsütelmigen bolup, peqetla bularning herbiy telim alghanliqi, iqtisat toplighanliqi we teshkilat qurup chiqqanliqigha dayir asassiz we pakitsiz söz – ibariler yer alghan.

Xuddi dunya jamaetchilikige melum bolghinidek, hazirgha qeder Uyghur milliy herikiti Bei jing olimpik yighinining bixeterlikige, chetellik tenherketchilerning amanliqigha tehdit salidighan hechqandaq bir emiliy herikette bolghini yoq, dimek Xitay hakimiyitining yuqarqi 8 neper Uyghurni, < Bei jing olimpikining amanliqigha éghir ziyan salghan > dep eyiplishining hech bir riyal asasining yoqluqini körsütüp turmaqta.

Diqqet qilishqa tegishlik nuxta shuki, Xitay hakimiyitining bu qétim élan qilghan atalmish < téroristlar tizimliki > de yer alghan Uyghurlarning hemmisila, < Sherqiy Türkistan Islam Herikiti > teshkilatining gholluq ezasi qilip körsütülgen bolup, bu, Xitay hakimiyitining Amerika we Birleshken döwletler teshkilati teripidin 2002 – yili 9 – ayda bu teshkilat heqqide alghan qararini dawamliq süyistimal qilish we bu qararni Uyghurlarning milliy heriketlirini basturush we Uyghur xelqighe qaratqan besim we zulum siyasitini dawamliq kücheytishning xelqaraliq siyasi kozurigha aylanduruwélishqa tirishiwatqanliqini körsütüp turmaqta.

Biz dunya jamaetchilikini Xitayning bu siyasi neyrengwazliqidin hushyar bolushqa chaqirimiz.

Xuddi dunya jamaetchilikige melum bolghinidek, 2008 – yilliq olimpik yighini Bei jingda ötküzüsh qarar qilinghandin keyin, Xitay hakimiyiti, < olimpikning bixeterlikige kapaletlik qilish > digen shoarni kötürüp chiqip, xelqara siyasi sehnilerde Uyghurlarni, < olimpikning bixeterlikige tehdit séliwatqan asasliq amil > dep teshwiq qilip, weten ichidiki bigunah Uyghurlargha qaratqan zerbe berish we qanliq basturush heriketlirini hessilep kücheytti.

Bu jeryanda Uyghurlargha qarita ashkare irqiy ayrimichiliq siyasiti yürgüzüp, Uyghurlarning Xitayning ichki ölkiliride erkin heriket qilishini cheklep, Bei jing qatarliq sheherlerde turiwatqan Uyghurlarni qanunsiz tutqun qilish we mejburi Sherqiy Türkistangha heydesh dolquni qozghidi.

Xitay hakimiyiti Sherqiy Türkistandiki Uyghurlarning sayahet we erkin heriket qilishinimu cheklep, minglighan binugah Uyghurni < gumanliq unsur > digen namda qolgha élip türmilerge tashlidi.

Xitay hakimiyitining Bei jing olimpik yighinini süyistimal qilip, Uyghurlarning heq – hoqoqlirigha éghir derijide tajawuz qilghanliqi, chetellerdiki Uyghur teshkilatliri teripidinla emes, hetta xelqaraliq kishilik hoqoq teshkilatliri we demokratik gherip elliri teripidinmu izchil türde tekitlinip kélinmekte.

Dimek, bügünki künde Xitay hakimiyitining 8 neper Uyghurni, < olimpikning bixeterlikige ziyan salghan > digen bednam bilen dunyagha < térorist > dep élan qilghanliqi, Xitay hakimiyitining Sherqiy Türkistanda Uyghurlargha qarita yürgüzüp kéliwatqan zulum siyasitini aqlash we pedezlesh üchün xelqara sehnilerde siyasi kozurgha erishish üchün élip barghan meqsetlik we pilanliq qarilash herikitidin bashqa nerse emes !

Biz, < Sherqiy Türkistan Informatsiyon Merkizi > bolush süpütimiz bilen, Xitay hakimiyiti teripidin élan qilinghan atalmish < ikkinchi türkümdiki Sherqiy Türkistan térorchiliri tizimliki > ni qéti shekilde ret qilimiz we dunya jamaetchilikini, bolupmu demokratik ellerni, Xitay hakimiyitining Uyghurlarning heqqani milliy heriketlirining xarektirini burmilash we qarilash meqsidide élip beriwatqan buxil siyasi neyrengliridin hushyar bolushqa, özlirining milliy mewjutluqini yoqutup qoyush xewipige duch kéliwatqan Uyghur xelqining nöwettiki echinishliq teqdirige hesdashliq qilishqa chaqirimiz !

Hörmet we ehtiram bilen :

Abdujelil Qaraqash

< Sherqiy Türkistan Informatsiyon Merkizi > ning reyisi

2008 . yili 10 – ayning 22 – küni

Germaniye / München
.