Rabiye Qadir Xanim Sanfranssko Shehiride Namayishqa Qatnashti

2008.04.09 RFA

Holliwudning meshhur artisi richard gér ependi, 8 - aprél, San fransiskodiki olimpikke qarshi yighilishta Rabiye xanim bilen körüshti.

UAA Photo / Rushan Abbas

2008 - yilliq olimpik meshilining tunji sepiri afinadin bashlanghan bolup, meshel hazirgha qeder Qazaqistan, Türkiye, London we Fransiye döletliridin ötüp, oxshash bolmighan derijidiki tosqunluqlargha uchridi, herqaysi döletlerde élip bérilghan narazliq heriketlirige Uyghur we tibetlikler qatniship, Xitayning olimpik ötküzüshge munasip kelmeydighanliqini anglatti.

Meshel amérikining sanfranssko shehirige yétip kelgende, Uyghur milliy herikitining rehbiri Rabiye Qadir xanim bashchiliqidiki Uyghurlar, narazliq bildürgüchi nechche onminglighan namayishchilar arisidin orun élip, qollirida ay yultuzluq kök bayraqlirini lepilditip, " Uyghurlargha erkinlik, sherqiy türkistan xelqige erkinlik" dégen shuarlirini towlidi.

Amérikining Sanfranssko shehirige yétip kelgen olimpik meshilige qarshi narazliq herikitige qatnishish üchün, amérikining washington shehiridin ayrilip, kaliforniye shitatining Sanfranssko shehirige yétip barghan Uyghur milliy herikitining rehbiri Rabiye Qadir xanim, téléfon ziyaritimizni qobul qilip, öz hayajinini anglatti.

Sanfransskoda olimpik meshilige qarshi élip bérilghan paaliyettin bir kün burun, Rabiye Qadir xanim , xelqara kechürüm teshkilatining olimpik munasiwiti bilen uyushturghan yighinida nutuq sözlep, Uyghurlarning nöwettiki weziyiti, Xitayning bolsa olimpik murasimi ötküzüshke qilche layiq emes ikenlikini bildürgen.

Amérika Uyghur birleshmisining muawin reisi roshen xanim, Rabiye xanim sözligen nutuqi shuningdek uzun yillardin buyan tibetke oxshash zulum chekken xelqlerni himaye qilip, öz yardimini körsetken holliwudning meshhur artisi richard gér ependining Rabiye xanim bilen körüshüsh jeryanlirini sözlep ötti.