|
Xitay Hökümiti Sherqiy Türkistanda Yüz Bergen Ténch Shekilde Élip Bérilghan
Namayishlargha Yalghan Nam Bérip, Qattiq Basturushqa Bashlidi
Xitay hökümitining Sherqiy Türkistandiki teshwiqat quralliridin biri bolghan
Tiyanshan Netning 4 - aprelda bergen xewiri we özimiz igiligen bezi
melumatlargha qarighanda, Uyghur xelqining Xitay tajawuzchillirigha qarshi
tinch yolda élip barghan namayishi peqet Hoten rayonidila yüz bérip
qalmastin eksiche Qeshqer wilayetining 12 nahiesige, Artush Oblastigha
qarashliq Uyghurlar toplushup olturaqlashqan rayonlargha, Ürumchi, Ghulja,
Aqsu, Turpan, Qumul, Korla qatarliq bir pütün Sherqiy Türkistan téritoriysi
miqyasigha kéngeygen.
Xitay xewer menbesidin qarighanda, yoqarqi rayonlardiki xelqler
pütüshiwalghandekla oxshash waqitta Xitay hökümitige bolghan naraziliqini
ipadilep, Sherqiy Türkistanning hemmila yéride her türlük paaliyetlerni élip
barghan. Ular élip barghan paaliyetliride insan heqliri we kishlik
hoquqlirini telep qilghan we musteqil jumhuriyet qurushtin ibaret
arzu-armanlirini ipadiligen.
Xitay hökümiti bu ammiwiy herketke qatnashqanlargha atalmish 3 xil küch
degen qalpaqni keydürüp, Uyghur xelqining heqqaniy dawasining bash
kötürüshige yol bermeslik üchün, uni ujuqturiwétishning yirginichlik
pilanliri üstide izdenmektiken.
Xitaylar pütün Sherqiy Türkistan miqyasida milyonlarche quralliq
jandarmillirini ishqa sélip, weqeni teshkilligüchilerni qolgha chüshürüsh
meqsidide, xelqning normal turmush tertiwige buzghunchiliq qilidighan,
qanunsiz adem tutush, sürüshtisiz jazalash, ya kéchisi, ya kündüzi ademlerge
aram bermesliktek qilmishlar bilen, xelqimizning izzet nepsi we milliy
ghururini depsende qilmaqtiken. Xitaylar weqelerni xelqar jamaetke set
körsütüp, Uyghur xelqini wehshiy basturushni qanunluq körsütüsh üchün, bu
qétimqi weqening meqsidi bir qétimliq keng-kölemlik jihat bolup, ular
dunyadiki islamgha ishenmeydighan milletlerni qirip tashlap, birlikke kelgen
Islamiy bashqurulidighan xelipilik qurmaqchi, dep dawarang sélishqa
bashlighan.
Xitaylar yene xelqimiz özlikidin teshkillinip otturgha chiqqan bu
heriketning arqisida gherip düshmen küchliri we islamiy radikal küchler bar,
dep biljirlap, xelqara jemiyetning aldida saxtikarliq qilmaqta.
Xitay metbuatlirining bu heqte bergen melumatliridin köre, bu ishni Xizbu
tehrir islamiy küchliri teshkilligenmish. Emiliyette Xitayning bu heriketke
keydürgen qalpiqi bir böhtandin bashqa nerse emes bolup, bu qétimqi weqe,
xelqimizning Xitay tajawuzchillirining wetinimiz Sherqiy Türkistanda
yürgüziwatqan, diniy, medeniy, iqtisadiy, maarip we ish texsimatigha ayit
milliy kemsitish tüsini alghan tengsiz siyasetlirige bolghan naraziliqi
sewebidin otturgha chiqqan milliy oyghunish herkitidin bashqa nerse emes.
(Xewerni Xitay menbelirige asasen Korash Atahan Teyyarlidi)
http://www.tianshannet.com/content/2008-04/04/content_2523521.htm
|
