Germaniyede Xitayning Döwlet Bayrimigha we Atalmish < Aptonom Rayon > gha Qarshi Namyish Ötküzüldi

ETIC xewiri: buyil 10 – ayning 1 – küni, Xitay xelq jumhuriyiti qurulghanliqining 58 – yilliqi, shundaqla atalmish < Xinjiang uyghur aptonom rayoni > qurulghanliqining 52 – yilliqidin ibaret.

Xitay hakimiyiti we Sherqiy Türkistandiki qorchaq hökümet her yili 10 – ayning 1 – künini < qosh bayram > dep élan qilip, daghdugha we heshem bilen xatirilep kelmekte.
Del bunung eksiche, 10 – ayning 1 – küni bolsa Uyghur xelqining neziride yéngi bir tiradigiye we zulumning xewerchisidin ibaret.

Shunga < Dunya Uyghur Qurultiyi >, 10 – ayning 1 – künini < Sherqiy Türkistan xelqining matem küni > dep élan qilip, chetellerdiki barliq Uyghurlarni bu matem künide türlük shekillerdin paydilinip özlirining mustebit kommunist Xitay hakimiyitige bolghan nepret we naraziliqlirini bildürüshke chaqirghan idi.

Birqanche yildin buyan chetellerdiki Uyghur teshkilatliri we uyghur jama’etliri, < Dunya Uyghur Qurultiyi > ning bu chaqiriqigha yeqindin awaz qoshup, namayish qilish, axbarat we bayanatlar élan qilish qatarliq köpxil shekillerdin paydilinip, Xitay hakimiyitige naraziliqlirini bildürüp kelmekte.

Bügün yene < 1 – öktebir > munasiwiti bilen, < Dunya Uyghur Qurultiyi > qarmighidiki < Yawropa Sherqiy Türkistan Birliki > teshkilatining uyushturushi bilen, Germaniyening München shehridiki Xitay konsulxanisi aldida naraziliq namayishi ötküzüldi.

Namayish, Germaniye waqti chüshtin keyin 17.00 – 22.00 qeder dawam qildi.

Bügünki namayishqa qatnashqan Uyghurlarning hemmisi digüdek Roza tutqan we namayish iptar waqtidin texminen 2 sa’et burun bashlanghan bolsimu, emma Xitay konsulxanisigha toplanghan uyghurlar janabi allahning mediti bilen qilche achliq we ussuzluq hes qilmay, kötirenggü roh we shija’et bilen toxtimastin jarangliq sho’ar towlap, özlirining kommunist Xitay hakimiyitige bolghan ghezep – nepritini we Sherqiy Türkistanda eziliwatqan xelqighe bolghan chongqur hesdashliqini namayan qilishti.

Germanche, Xitayche we Uyghurche sho’arlar bilen Xitay konsulxanisi aldini zil – zilige salghan namayishchilarning hemmisi digüdek qollirida sherqiy türkistanning ay – yultuzluq kök bayriqini we olimpik yighinining Xitayda ötküzülishige qarshi sho’arlar yézilghan lozunkilarni igiz kötürüshken idi.

DUQ ning bash katibi we < Yawropa sherqiy türkistan birliki > ning bash aktibi Dolqun Eysa namayish bashlinishtin burun namayishqa kelgen ammigha qilghan sözide, bügün peqet Germaniyedila emes, dunyaning herqaysi elliridiki Uyghur teshkilatlirining birdek halda özliri turiwatqan ellerdiki Xitay elchixaniliri aldida naraziliq namayishliri ötküziwatqanliqini, herqaysi ellerde yashawatqan Uyghur qérindashlirimizningmu DUQ ning matem küni heqqidiki chaqiriqigha awaz qoshup, 10 – ayning 1 – küni toy – tökün, meshrep we bashqa köngül echish pa’aliyetliridin uzaq turup, weten ichidiki xorliniwatqan we eziliwatqan xelqining dert – dermanlirigha ortaq boluwatqanliqini tekitlep ötti.

Bügün Germaniyening München shehridiki Xitay konsulxanisida < döwlet bayrimi > ni tebriklesh ziyapiti uyushturulghini üchün, Germaniye saqchiliri konsulxana aldidiki amanliq tedbirlirini alahide kücheytken idi, shundaqtimu namayishchilarning orni konsulxanidin texminen 50 métir yiraqliqta, shundaqla konsulxanigha tutishidighan yol eghizida bolghini üchün, konsulxanigha kirip – chiqquchilarning hemmisi namayishchilarning jarangliq sho’arlirigha we ularning jushqun keypiyatigha shahid boldi.

Bu qétimqi namayish belgilengen muddet ichide ghelibilik ayaqlashti.