Sherqiy Türkistanda 1 Milyon 290 Ming Déhqanning Yilliq Kirimi 700 Yuandin Töwen

Kommunist Xitay hakimiyitining Sherqiy Türkistanda iqtisadi jehette Xitay köchmenliri bilen yerliklerge qarita periqliq siyaset yürgüzishi tüpéylidin, ikki terep otturisidiki iqtisadi periqmu kishini chöchütidighan dérijide chongaymaqta.

Xitayning resmiy statiskilirida körsütülishiche, nöwette Sherqiy Türkistanda Bingtuan qarmighidiki Xitay déhqanlirining yilliq kishi béshigha toghra kélıdighan otturiche kirimi 5000 yuan, emma, Uyghurlar zich olturaqlashqan Qeshqer, Atush we Hoten rayonlirida 800 mingdin köpirek déhqanning yilliq kishi béshigha toghra kélıdighan otturiche kirimi 700 yuangimu barmaydu.

Mesilen, < Xinjiang iqtisat géziti > ning 6 – ayning 20 – künidiki xewiride körsütülishiche, 2006 – yilining axirigha qeder Sherqiy Türkistan boyiche yilliq sap kirimi 700 yuangimu barmaydighan déhqanlarning sani 1 milyon 290 ming neper bolup, déhqanlarning 10.16 pirsentini igélleydiken.

Bularning ichide 900 ming nepiri jenobi rayonlardiki déhqanlar bolup, peqet Qeshqer, Atush we Hoten rayonlirida 800 mingdin köpirek déhqanning yilliq kishi béshigha toghra kélıdighan kirimi 700 yundin töwen, bular pütünley digüdek Uyghur déhqanliridin ibaret.
Nöwette Sherqiy Türkistan noposining 70 pirsenti yeza noposi bolup, Uyghurlarning texminen 85 pirsentidin köpireki yezilarda yashaydu.

6 – ayning 19 – küni Ürümqide chaqirilghan < Aptonom rayonluq yeza turmushigha kapaletlik qilish yighini > da, Sherqiy Türkistandiki déhqanlarning kishi béshigha toghra kélıdighan yilliq turmush ölchimi 700 yuandin töwen bolmasliqi kerek > dep békitilgen.

Wetendin kélgen inkaslardin melum bolushiche, nöwette Sherqiy Türkistanning jenobi rayonlirida Uyghur tilemchilerning sani roshen dérijide köpeygen..