|
Germaniyediki Bir Xitay Resturanida, Resturanning Xojayini Bilen Birge 6
Xitay Échinishliq Halda Öltürüldi
< Germaniye dolqunliri > radiosining xewer qilishiche, 5 – fewral küni
kechte, Germaniyening port shehri Hamburgqa yeqin jaydiki Sittensen shehride,
< China – restaurant Lin Yue > dep atalghan Xitay resturanida, resturanning
Xitay xojayini, unung ayali we resturanning xizmetchiliridin bolup 6 kishi
namelum kishiler teripidin échinishliq halda étip öltürülgen,
öltürülgenlerning 3 nepiri er, 3 nepiri bolsa ayal bolup, qatillar peqetla 2
yashliq bir balini saq qoyghan, weqede oq tegip eghir yarilanghan yene bir
kishi doxturxanida bolup, unung ehwalimu nahayiti xeterlik iken.
Yuqarqi weqe pütün Germaniyeni zil – zilige saldi, Germaniye metbu’atlirida,
< bu qatilliq weqesini Xitay mafiyalar keltürüp chiqarghan bolushi mumkin >
digen qarash ilgiri sürülmekte.
< Dunya geziti > ning xewer qilishiche, 90 – yillarda Hamburg shehride Xitay
mafiyalirining Resturant hojayinliridin < qoghdash heqqi > digen namda
mejburi halda hashar élish hadisiliri körülgen, hazir Hamburg shehrining
özidila 400 din artuq Xitay resturani bolup, mölcherlerge qarighanda
ularning 90 pirsenti Xitay mafiyalargha tapan heqqi töleydiken, hetta Xitay
mafiyalar heddidin eship, Türkler we Italiyélikler achqan Resturantlarghimu
séliq sélishqa bashlighan. emma saqchi terep bu qarashlarni ret qilghan.
Bezi gheyri resmi statiskilarda körsütülishiche, nöwette Germaniyediki
Xitaylarning sani 100 ming etrapida bolup, Hamburg bolsa Xitaylarning sani
eng köp sheherlerning biri.
Metbu’atlarda xewer qilinishiche, shu küni kech sa’et 12.30 da, bir kishi bu
resturanda ishlewatqan ayalini élish üchün resturangha kelgende, yerde 6
kishining jesidini körgen, ularning put – qolliri baghlanghan bolup, hemmisi
qoral bilen étip öltürülgen.
Weqedin keyin, 80 din artuq saqchi neqmeydangha yetip kélip tekshürüsh élip
barghan, Sittensen sheherlik saqchi idarisi yene Germaniye fediral saqchi
idarisidin yardem telep qilghan.
Weqe yüz bergen Resturant Germaniye 1 – nomurluq yuquri süretlik tashyolning
boyigha jaylashqan bolup, qatillarning qechishi üchün qolayliq iken we
qatillarning hetta bashqa döwletlerge qechip kétish éhtimalimu yuquri iken. .
|
