|
Pakistanning Gilgit Rayonida Yashawatqan Uyghurlar Özlirining En – Eniwiy
Örp – Adetlirini Saqlap Kelmekte
 Öz muxpirimizning bildürishe, nöwette Pakistanning Gilgit rayonida
yashawatqan Uyghurlarning sani 700 etrapida bolup, ularning hemmisi
digüdek1949 – yili kommunist Xitaylar Sherqiy Türkistanni ishghal qilghanda
qéchip chiqqanlar iken.
Eslide ularning sani 1500 kishidin artuq bolup, 1997 – yili Gilgit rayonida
chong topilang yüz bergende, buyerdiki Uyghurlarning yerimidin köpireki
Islamabat we Lahur sheherlirige köchüp ketken.
Pakistanda yashawatqan bu Uyghurlarning köpünchisi Sherqiy Türkistanning
Qeshqer we Hoten rayonliridin kelgen bolup, ularning köpünchisi ata miras
kespige warisliq qilip, Nawaychiliq, köktatchiliq, sa’etchilik we türlük
tijaret ishliri bilen meshghul bolidiken, ularning turmush sewiyesimu
Pakistanning sharayiti boyiche alghanda otturhal sewiyede iken.
Pakistanda yashawatqan Uyghurlar teripidin qurulghan bir fonda jemiyiti
bolup, bu fonda jemiyiti mexsusla qiyinchiliqi bar Uyghurlargha, shundaqla
wetendin chiqqan Uyghur hajilargha yardem berishni asasiy meqset qilghan
bolup, bu Fonda jemiyitining yardimi bilen Pakistanning Islamabar shehride
Uyghurlar üchün mexsus rabatlar qurulghan bolup, bu rabatlar wetendin
chiqqan Uyghur hajilargha we qiyinchiliq ichide qalghan Uyghurlargha heqsiz
xizmet qilidiken.
Pakistanda yashawatqan Uyghurlarning hemmisi digüdek özlirining milliy örp –
adetliri boyiche yashap kelgen bolup, adette öyliride özara Uyghurche
sözlishidiken we özlirining ana tilini xeli mukemmel saqlap qalghan. Unung
üstige ular yerlikler bilen asasiy jehettin toy qilmaydiken we mumkin bar
Uyghurlar bilen toy qilishqa tirishidiken we toylarmu weten pediside
pütünley Uyghurche usolda ötküzülidiken.
Pakistanda yashawatqan Uyghurlarning, bolupmu yashlarning milliy tuyghuliri
intayin küchlük bolup, Sherqiy Türkistanning we Uyghurlarning teqdiri üchün
qayghuridighan we bash qaturidighanlar köp iken, emma Pakistanning alaqe –
uchur ishliri tereqqi qilmighini üchün, buyerde yashawatqan Uyghurlarmu
Sherqiy Türkistan heqqidiki we Uyghur dawasining chetellerdiki tereqqiyat
ehwali toghrisidiki melumatlardin yeterlik derijide xewerdar bolalmaydiken..
|
