Xitay Sehiye Ministirlikining Étirapi:

<Doxturxanilarda bashqa bimarlargha köchüriliwatqan beden ogranlirining mutleq köp qismi ölüm jazasigha höküm qilinip étip öltürülgen mehbuslargha ayit >

< Germaniye dolqunliri > radiosining xewer qilishiche, Xitay sehiye ministirlikining mu’awin ministiri Huang hao fu, < xelqaraliq organ köchürüsh tibbi yighini > da qilghan sözide, Doxturxanilarda bashqa bimarlargha köchüriliwatqan beden ogranlirining mutleq köp qismining ölüm jazasigha höküm qilinip étip öltürülgen mehbuslargha ayit ikenlikini, yene bir qismining bolsa türlük qatnash weqeliride qaza qilghan kishilerning organliri ikenlikini étirap qilghan.

Huang Hao Fu bu heqte Xitay hökümitini aqlap, < biz organ yötkesh opiratsiyesi qilishtin burun, ölüm jazasigha höküm qilinghan mehbuslarning yaki ularning ayile – tawabatlirining ruxsitini alimiz > dep körsetken.

Yuqarqi xewerde, ilgiri Xitay hökümitining xelqaraliq kishilik hoqoq teshkilatlirining bu heqtiki eyipleshlirini izchil türde inkar qilip kelgenliki, Huang hao funing ölümge höküm qilinghan mehbuslarning ezalirini opiratsiye bilen köchürüp alghanliqini étirap qilishqa mejbur bolushigha, Engiliye Radio shirkitining muxpiri bilen chetellerdiki Falungung teshkilatlirining bu heqte körsetken eniq délil – ispatlirining sewepchi bolghanliqi bayan qilinghan.

Mesilen, Engiliye Radio shirkitining bir muxpiri, Xitayning Tian jin shehridiki bir doxturxanida élip berilghan organ yötkesh opiratsiyesini mexpi kamera bilen körünüshke alghan, u yene doxturxana mesulliri bilen körüshüp, dadisining aghriq ikenlikini we bir börekke ehtiyaji barliqini eytqanda, doxturxana mesulliri ununggha, < eger 32 ming euro pulni Shang gangdiki melum bir hisap nomurigha yatquzsingiz, birqanche hepte ichidila bir börekke erisheleysiz > dep kapalet bergen, muxpir ulardin, < bu börek ölüm jazasigha höküm qilinghan mehbuslarning börikimu ? > dep sorighinida, ular keskin halda, < shundaq, eslide bu bir yaxshi ish, chünki bunung bilen mehbus özining jinayi qilmishlirining melum qismining bedilini ötigen bolidu > dep jawap berishken.

Yene Amerikining Los Anjélis shehride olturushluq 69 yashliq bir bay Xitay muhajiri Xitayning Guang dong shehrige kélip buyerdiki bir doxturxanida börek yötkesh opiratsiyesi qildurghan we bir börek üchün 40 ming dollar tapshurghan, bu kishi doxturxanidin sorash arqiliq, özige sélinghan bu börekning yengila étip öltürülgen 30 yashliq bir mehbusqa ayit ikenlikini bilgen.

Undin bashqa yene chetellerdiki Falungung teshkilatlirimu, Xitayda bir qisim doxturlar bilen emeldarlarning pul tepish meqsidide mehsus mehbuslarning organini yötkep sétish gurohi uyushturup, teshkillik halda jinayet ishlewatqanliqini, bu gurohning étip öltürülgen mehbuslarningla emes, hetta texi étip öltürülmigen mehbuslarningmu beden azalirini chetelliklerge yuquri bahada sétiwatqanliqini délil – ispatlar bilen pash qilghan.

Mezkur maqalida bayan qilinishiche, 80 – yillardin buyan xelqaraliq kishilik hoqoq teshkilatliri Xitayning ediliye tarmaqliri bilen Doxturxanilirini, < ölümge höküm qilinghan mehbusning raziliqini almayla ularning beden organlirini yuquri bahada sétip kelmekte > dep eyiplep kelgen.

Xitayda nöwette ölüm jazasigha höküm qilinip étip öltürülgenlerning sani, dunyaning bashqa ellirining omomiy sanidinmu köp bolup, xelqara kechürüm teshkilatining bildürishiche ötken yili Xitayda 1770 neper mehbus étip öltürülgen, emma Xitay qanun tarmaqlirining mölcherige qarighanda, her yili étip öltürülidighan mehbuslarning heqiyqi sani 8 – 10 ming etrapida iken.

< Germaniye dolqunliri > radiosining bu maqalisida, Xitay hökümitining bu mesilede xelqara jama’etchilikni izchil türde aldap kelgenliki, bir Xitay emeldarining eytqini bilen, yene bir egeldarning eytqanlirining bir – birige zit ikenliki, texi buyil 4 – aydila Xitayning bir emeldarining bayanatida, Xitayda bimarlargha yötkep sélinghan organlarning nahayiti az bir qisminingla mehbuslargha ayit ikenliki otturigha qoyulghan bolsa, emdilikte bolsa Xitayning sehiye ministiri orunbasarining del bunung eksini sözlewatqanliqi qeyt qilinghan.

Xelqara kishilik hoqoq teshkilatining Shang gangda turushluq küzetküchisi Beklin ependi bu heqte toxtulup, < ilgiri Xitay dayirliri mehbuslarning beden organlirini sétish mesilisini talash – tartish we muhakime qilishnimu cheklep kelgen idi, chünki bu mesile Xitayning kishilik hoqoq sahesidiki mohim mesililerning biri bolup keldi, shunga Xitay hökümiti ölümge höküm qilinghan we beden organliri sétilghan mehbuslarning heqiyqi sanini dunyagha elan qilishi lazim > dep körsetken.

Gerche Sherqiy Türkistanda mehbuslarning organlirini éliwélip bashqilargha sétish hadisilirining qachan bashlanghanliqi heqqide eniq bir melumat bolmisimu, emma 90 – yillarning bashliridin étibaren, Ürümchidiki bezi nuxtuluq doxturxanilarning, ölümge höküm qilinip étip öltürülgen mehbuslarning börek qatarliq ezalirini bashqa bimarlargha yuquri bahada yötkep satqanliqi heqqidiki xewerler tarqalghan idi. Hazir bolsa buxil hadisiler xuddi Xitayning ichki ölkiliridikidek, Sherqiy Türkistandimu adettiki ishqa aylinip qaldi we organlirini satidighanlar pütünley Xitay jinayetchilerdin teshkil tapmaqta.

Gerche hazirgha qeder Uyghur siyasi mehbuslarning ichki beden organlirining oghurlanghanliqi heqqide eniq ispat bolmisimu, emma, ölüm jazasigha höküm qilinip étip öltürülgen bezi uyghur siyasi mehbuslarning ayile - tawabatliri qanun organliridin jesetni tapshurup élip depne qilghanda, jesetning bezi jaylirining opiratsiye qilinip yengidin tikip qoyulghanliqini bayqighanliqigha dayir xewerler jemiyette tarqilip yürmekte.