Ürümchidiki Saqchilarning Sani Yétersiz

Xitay metbu’atlirida körsütülishiche, Ürümchi noposining shiddet bilen köpüyishi saqchi tarmaqlirining béshini qaturghan.

Statiskilarda körsütülishiche, ötken yili Ürümchi shehrining muqim noposi 2 milyon 350 minggha, herketchan noposi 800 minggha yetken bolup, ikkisini qoshqanda sheher ahalisining sani 3 milyondin ashidiken, emma, nöwette Ürümchi sheherlik saqchi idarisigha qarashliq 72 saqchixanidiki saqchilarning sani sheher ahalisining amanliqini qoghdashta yétersiz qalghan. Döwlet jama’et xewipsizlik ministirlikining ölchimi boyiche alghandimu Ürümchidiki saqchilarning sani tolimu yétersiz iken.

Ürümchi saqchi dayirisi bu boshluqni toldurush üchün, sheherlik we rayonluq saqchi idarisida ishleydighan bir türküm saqchilarni herqaysi mehellilerdiki saqchixanilargha yötkeshke bashlighan.
Wetendin kelgen xewerlerdin melum bolushiche, saqchi yétishmeslik mesilisi peqetla Sherqiy Türkistandiki Xitaylar zich toplushup olturaqlashqan sheher we rayonlarda mewjut bolup, Uyghurlar toplushup olturaqlashqan jenobi rayonlarda bolsa saqchilar éship – téship turidiken.

Xitay hakimiyiti Sherqiy Türkistanda qanun tarmaqlirining pütün küchini atalmish <milliy bölgünchiler> ge qaratqini üchün, buni puset bilgen we bu siyasettin ilham alghan Xitay köchmenliri ichide jinayi ishlar dilolirining sadir bolush nisbiti éshishqa bashlighan.

Mesilen, <Xinjiang géziti>, <Xinjiang qanunchiliq géziti>, <Tianshan Tori> … qatarliq Xitayning asasliq metbu’atlirining qanun sehipilirige köz tashlaydighan bolsaq, nöwette Sherqiy Türkistanda qatilliq, bulangchiliq, zeherlik chékimlik etkeschiliki, aldamchiliq, lükcheklik, buzuqchiliq jinayetlirini sadir qiliwatqanlarning hemmisining digüdek Xitay köchmenliri ikenlikini körimiz.