Amerikida Sherqiy Türkistan Jumhuriyetliri Xatirilendi

11‏- Ayning 12 küni chetellerdiki Uyghurlar 1933‏- yili qurulghan Sherqiy Türkistan islam jumhuriyiti we 1944‏- yili qurulghan Sherqiy Türkistan jumhuriyetlirini türlük paaliyetler bilen xatirilidi hemde 29‏- Öktebir küni wapat bolghan ataqliq Uyghur naxshichisi, kompozitor we kishilik hoquq paaliyetchisi Küresh Küsenning rohigha atap xetme- Qur´an we dua - tilawet qildi.

Uyghur milliy herikitining rehbiri Rabiye xanimning yétekchlikidiki Uyghur -Amérika birleshmisi teripidin Shimaliy Wérjiniyada ötküzülgen Sherqiy Türkistan jumhuriyitini xatirilesh paaliyitige New-York, New-Jérsey, Pésilwaniye, Californiye we Boston qatarliq shtatlardin kelgen we Wérjiniya, Marilan we Washington DC etrapida yashawatqan Uyghurlar, chégrisiz muxbirlar teshkilatining wekilliri hemde Türkiyedin kelgen ataqliq ottura asiya mutexessisi, Türkiyening qoch uniwérsitétining proféssori Témur xoja oghli qatarliqlar bolup ikki yüz etrapida kishi qatnashti.

Yéghinning ichilishida söz qilghan Uyghur milliy herikitining rehbiri we Uyghur Amérika birleshmisning reisi Rabiye Qadir xanim, 20‏- esir ichide ikki qétim jumhuriyet qurghan Uyghurlarning, dunyagha herqachan öz musteqil dölitini qurush iqtidarigha ige bir millet ikenlikini körsetkenlikini bildürüp, barliq Uyghurlarni ittipaqliship erkinlik we démokratiye üchün küresh qilishqa chaqirdi.

Küresh Küsenning rohigha jümlidin Sherqiy Türkistan xelqining erkinliki yolida shéhit bolghan qurbanlargha atap xetme - Quran we dua we tilawet qilish bilen bashlanghan jumhuriyet küni paaliyiti 1933‏- Yili 12‏- noyabir küni Qeshqerde Sabit Damollamning we 1944‏- yili Ghuljida Èlixan Türemning rehberlikide qurulghan ikki qétimliq Sherqiy Türkistan jumhuriyitining tarixiy, dölet qurulmisi we ularning axirida yoq qilinish sewebliri heqqide bérilgen doklatlar bilen axirlashti.

Bu arida, yene jumhuriyet küni munasiwiti bilen 11‏- Ayning 12‏- küni özlirini sürgündiki Sherqiy Türkistan hökümitining wekilliri dep atighan bir guruppa Uyghur, Washingtondiki Xitay bash elchixanisi aldida namayish ötküzüp, Xitay hökümitidin Sherqiy Türkistandin chiqip kétishni telep qildi. ( RFA din Qanat)