|
DUQ Merkizi Orgini Germaniyede Ikki Jumhuriyétni Xatirilesh we Merhum Küresh
Küsenni Eslesh Pa’aliyiti Ötküzdi
Öz xewirimiz: 11 – ayning 12 – küni Dunya Uyghur Qurultiyi
Merkizi orgini Germaniyening München shehride chong murasim ötküzüp, 1933 we
1944 – yilliri qurulghan ikki jumhuriyitimizni xatirilesh bilen birge, Dunya
Uyghur Qurultiyining bash teptishi we Uyghur Xelqining munewer oghlani
Küresh Küsen ependining rohigha atap du’a – tilawet oqudi.
Bu qétimqi murasimgha riyasetchilik qilghan <Dunya Uyghur Qurultiyining>
bash katibi we <Yawropa Sherqiy Türkistan Birliki> teshkilatining reyisi
Dolqun Eysa ependi aldi bilen söz qilip, 1933 – we 1944 – yilliri qurulghan
ikki jumhuriyitimizning Sherqiy Türkistan xelqi üchün hüriyet, erkinlik we
musteqilliqning simowuligha aylanghanliqini, bu ikki jumhuriyettin miras
qalghan ay – yultuzluq kök bayraqning hazirmu hem Uyghur xelqining küresh
ghayisining belgisi süpitide özining mewjutliqini saqlap kelgenlikini,
Sherqiy Türkistan xelqining bu ikki jumhuriyetni wujutqa chiqirish yolida
zor bedel töligen shehitlirimizni, ghazilirimizni ebediyen yad
etidighanliqini we ularning inqilawi rohi adaqqiche yashnitidighanliqini
bayan qildi.
Dolqun Eysa ependi yene, özining barliqini wetini hem millitige atighan,
shundaqla milliy musteqilliq herikitimiz üchün öchmes töhpilerni qoshush
bilen xelqimizning qelbide texit qurghan merhum Küresh Küsen ependining ish
– izlirini qisqiche eslitip ötti.
Murasimda, merhum Küresh Küsen ependining rohigha atalghan du’a – tilawet
ayaqlashqandin kéyin, nöwet bilen <Dunya Uyghur Qurultiyi> ning reyisi Erkin
Alptekin, Sabiq muawin reyisi Enwerjan, Qurultay ijrahiye komutetining
muawin reyisi Ablimit Tursun, München chetellikler mejlisining muawin reyisi
Esqerjan, Qurultay fondining reyisi Ablikim Hoten, Küresh Küsenning
sepdashliridin Perhat Yorungqash, Ilyar Ömer … qatarliqlar söz qilip, ikki
jumhuriyitimizni tebriklesh bilen birge, merhum Küresh Küsen ependining
inqilawi ish – izlirini eslep ötti.
Erkin Alptekin ependi murasimda qilghan sözide, Küresh Küsenning sen’et we
mujadile hayatigha intayin yuquri baha berdi we Küresh ependining
chetellerde élip bériliwatqan milliy herikitimizning janlinishi, küchüyishi
we zoruyishi üchün öchmes töhpe qoshqanliqini köz yashliri ichide sherhilep
ötti we pütün Uyghur yashlirini Küresh ependining küreshchan rohidin örnek
élishqa chaqirdi.
Erkin ependi sözide yene, nöwette Sherqiy Türkistan milliy musteqilliq
herikitining intayin qiyin bir basquchqa qedem qoyghanliqini, shunga, milliy
küresh sepidikilerning bir – biri bilen bolghan dostluq, söygü, hemkarliq we
ittipaqliqni téximu kücheytishi lazimliqini, pütün Uyghur xelqiningmu Küresh
Küsenge oxshighan munewer oghlanlirini hayat waqtida qedirlishi, asrishi
kerekligini alahide tekitlep ötti.
Qurultaygha wakaliten Shiwitsiyege bérip Küresh ependining depne murasimigha
qatnashqan Ablimit Tursun we Ablikim Hoten ependilerning Küresh ependi
heqqidiki tesiratlirimu jama’etni küchlük hayajangha saldi.
Bu qétimqi murasimda, Qurultay qarmighidiki <Yawropa Sherqiy Türkistan
Birliki> teshkilating Uyghur ösmürliri hor ömigi, merhum Küresh Küsen ependi
teripidin ijat qilinghan <Sherqiy Türkistan Milliy Marshi> ni orunlighanda,
zaldiki yüzligen Uyghurlar qattiq hayajandin köz yashlirini tulalmay
buquldap yighlashti.
Murasimda yene, Dunya Uyghur Qurultiyi bilen Sherqiy Türkistan Informatsiyon
Merkizi teripidin birlikte hazirlanghan we Küresh Küsen ependining depne
murasimi hem qisqiche hayati tonushturulghan vidio filmi qoyup bérildi.
Bu qétimqi murasimgha, Germaniyede yashawatqan pütün Uyghurlarning hemmisi
digüdek toluq ishtirak qildi.
Murasim jeryanida, Dunya Uyghur Qurultiyining chaqiriqigha asasen, merhum
Küresh Küsenning ayilisige we Qurultay teripidin tertiplengen <Uyghur
Mukapati Fondi> gha iyane toplash élip bérildi, jama’etmu Qurultayning
chaqiriqigha qizghin awaz qoshup, bes – beste pul iyane qilishti.
|
