|
Germaniyede Küresh Küsenning Rohi Üchün Xetme – Qur’an Ötküzüldi
Öz xewirimiz: bügün, merkizi Germaniyening München shehridiki
<Dunya Uyghur Qurultiyi> ning Diniy ishlar bölümi Qurultay ishxanisida, 29 –
öktebir küni Shiwitsiyede yürek kesili bilen wapat bolghan <DUQ> ning bash
téptishi Küresh Küsen ependining rohigha atap mexsus Xetme – Qur’an ötküzdi.
Xetme – Qur’angha Germaniyening München shehride yashawatqan köp sandiki
Uyghurlar alahide kélip qatnashti.
Bu qétimqi pa’aliyet jeryanida merhum üchün qur’an oqulup, unung rohigha
atap du’alar qilindi.
Xetme – Qur’andin kéyin, <Dunya Uyghur Qurultiyi> ning sabiq mu’awin reyisi
Enwerjan, <Sherqiy Türkistan Informatsiyon Merkizi> ning pirezidenti
Abdujelil Qaraqash, <München chetellikler mejlisi> ning mu’awin reyisi
Esqerjan, DUQ diniy ishlar bölümining mudiri Turghunjan Hajim, yardemchisi
Abdujelil Emet qarimlar nöwet bilen söz qilip, Küresh Küsenning Uyghur
mediniyitige, sen’itige we Sherqiy Türkistan milliy musteqilliq herikitige
qoshqan töhpilirige yuquri baha bérish bilen birge, pütün Sherqiy Türkistan
yashlirini, jümlidin chetellerde yashawatqan Uyghur yashlirini öz ara téximu
zich ittipaqliship we hemkarliship, Küresh Küsen ependining Küreshchan
rohigha warisliq qilishqa chaqirdi.
Bundin bashqa yene Küresh Küsen ependi bilen bir yurtluq bolghanlar, ilgiri
unung bilen birge xizmet qilghanlar we unung bilen yéqin dostluq
munasiwitide bolghanlardin Perhat Yorungqash, Ilyar Ömer, Abdurehimjan,
Abitjan Domollam qatarliqlar merhumning weten ichi we sirtidiki ish –
pa’aliyetliri heqqide jama’etke melumat bérip ötti we bashqa yurtdashlarmu
cheksiz qayghu we köz yashliri ichide merhumgha bolgan tesiratlirini bir –
birlep otturigha qoyup ötti.
DUQ ning bildürishiche, DUQ ijrahiye komutétining mu’awin reyisi Ablimit
Tursun birqanche kishilik hey’et bilen , merhum Küresh ependining bügün
Shiwitsiyede ötküzilidighan depne murasimi üchün Germaniyedin Shiwitsiyege
yétip barghan.
|
