Firansiyemu Xitay Bilen Kishilik Hoqoq Söhbitini Yolgha Qoymaqchi

< Germaniye Dolqunliri Radiosi > ning xewiride körsütülishiche, ötken charshenbidin étibaren Xitayda resmi ziyarette boluwatqan Firansiye Pirezidenti Jack Shirak muxpirlargha qilghan sözide, Xitay bilen Firansiye otturisida kishilik hoqoq söhbitini yolgha qoyush heqqide anglashma saqlanghan.

Xitay rehberliri Shirak bilen ötküzgen söhbetliri jeryanida, Xitayning Birleshken döwletler teshkilati omomiy bayannamisining rohigha asasen, kishilik hoqoqni we insanlarning asasi erkinliklirini qoghdaydighanliqi heqqide wede bergen.
Xitay bilen Yawropa birliki otturisida bir qanche yildin buyan her yili Kishilik hoqoq söhbiti ötküzülüp kelinmekte.

Germaniyemu Xitay bilen hem kishilik hoqoq söhbitini, hem qanun döwliti berpa qilish söhbitini qerellik halda dawamlashturup kelmekte.

Germaniye metbu’atliri, 1989 – yilidiki Beijing weqesidin kéyin, Firansiyening kishilik hoqoq mesiliside Xitaygha qarita keskin we qattip pozitsiyede bolghanliqini, emma 1995 – yilidin keyin Firansiyening bu jehette boshushup ketkenlikini we hazir Yawropa birligining 89 – yilidin buyan Xitaygha qaritip kéliwatqan qoral – yaraq embargosini emeldin qaldurush herikitining bayraqdarigha aylanghanliqini bildürüshmekte.

< Germaniye Dolqunliri Radiosi > ning xewiride körsütülishiche, Firansiyede Xitayning anche chong tesiri yoq, gerche xelqara siyasi sehnilerde Xitay bilen Firansiye köp mesililerde ortaq meydanda turup kelgen bolsimu, emma Firansiyening Xitaygha qaratqan siyasiti meghlubiyet bilen ayaqlashqan, chünki Firansiyening Xitay bazarlirida igelligen salmiqii Germaniye we bashqa döwletlerge sélishturghanda intayin ajiz, Firansiye mallirining Xitay bazarliride igelligen nisbiti aranla 1.4 pirsent. Gerche bu qétim Xitay Firansiyedin 170 ayrupilan sétiwélishni qarar qilghan bolsimu, emma 10 milyart dollar qimmitidiki bu sodining Xitay bilen Firansiye otturisidiki sodigha chong bir tesir körsitélishi natayin.