Münchendiki Iptarda Sherqiy Türkistan Mesilisi Anglitildi

Öz xewirimiz: tünögün,<Sherqiy Türkistan Informatsiyon Merkizi> ning pirezidénti Abdujelil Qaraqash ependi teklipke bina’en <Germaniye Türk Fédiratsiyonni> ning München shöbisi teripidin bérilgen iptargha qatniship, iptardin kéyinki tirawil namizining aldi – keynide jama’etke mexsus Sherqiy Türkistan mesilisi heqqide melumat berdi.

München shehride yashawatqan Türkler ichidiki tonulghan karxanichi we sodigerler, diniy zatlar, Türkiyedin kélip oquwatqan uniwersitét oqughuchilirining wekilliri teklip qilinghan bu qétimqi iptar jeryanida, <Germaniye Türk Fédiratsiyonni> München shöbisining rehberliri mexsus söhbet yighini uyushturup, Abdujelil Qaraqash ependini Uyghurlarning nöwettiki weziyiti heqqide melumat bérishke teklip qildi, Abdujelil Qaraqash ependi Sherqiy Türkistan musulmanliri duch kéliwatqan siyasi bésim we zulumlar heqqide etirapliq melumat bérish bilen birge yene, <Sherqiy Türkistan Informatsiyon Merkizi> teripidin mexsus ramizangha atap hazirlighan we Xitayning Uyghur xelqighe seliwatqan türlük zulumliri ekis’ettürülgen teshwiqat waraqlirini jama’atke tarqitip berdi.

Abdujelil Qaraqash ependi riyasetchilikidiki <Sherqiy Türkistan Informatsiyon Merkizi> bilen <Germaniye Türk Fédiratsiyoni> München shöbisi otturisidiki dostluq we hemkarliq munasiwetliri uzun yillardin buyan izchil türde dawam qilip kelmekte, shundaqla bu teshkilat Sherqiy Türkistan dawasini meddi we meniwiy jehettin qollapla qalmastin, Germaniyege siyasi panahliq üchün kelgen Uyghur qérindashlirighimu qolidin kélishiche yardem qilip kelmekte.

Bu qétimqi iptar jeryanida <Germaniye Türk Fédiratsiyonni> ning sabiq mesulliridin Weysel Denel we Gazi Kocak ependilermu söz qilip, Uyghur qerindashlirining milliy dawasini ebediyen qollap – quwetleydighanliqlirini bildürüshti.