Paxtichi Xitaylar Ishchilar Uyushmisigha Qobul Qilinishqa Bashlidi

Köpchilikke melum bolghinidek, yéqinqi bir nechche aydin buyan 100 minglighan Xitay <paxta térish> digen namda Xitayning herqaysi ölkiliridin Sherqiy Türkistangha éqip kirishke bashlighan idi. Bu, Xitay hakimiyitining Sherqiy Türkistangha köchmen yötkesh siyasitining mohim bir parchisi bolup, yerliklerning naraziliqigha uchrimasliq üchün Xitay hökümiti bu Xitay köchmenlirini <paxta térishqa kelgenler, 2 – 3 aydin kéyin qaytip kétidu> dep izahlighan idi. Emma wetendin kelgen bezi xewerlerde körsütülishiche, Xitay hökümiti <paxta térish> digen namda kéliwatqan bu Xitay köchmenlirini Sherqiy Türkistangha yerleshtürüp qélish üchün bir qatar etiwar bérish siyasetlirini tüzüp chiqip, ularni qaytip ketmeslikke dalalet qilishqa bashlighan.

Mesilen, <Tianshan Tori> ning xewer qilishiche, 10 – ayning 11 – küni <aptonom rayonluq bash ishchilar uyushmisi> ning mu’awin reyisi Zhang Jinyi bashchiliqidiki hey’et Bingtuanning 8 – dewiziyesige bérip, ichkiridin kelgen paxtichi Xitaylarni ishchilar uyushmisining ezaliqigha qobul qilish murasimi ötküzgen we ulargha ezaliq kénishkisi tarqitip bérgen.

Mezkur xewerde körsütülishiche, peqetla yeza igilik 8 – dewiziyesidinla ishchilar uyushmisigha qobul qilinghanlarning sani 142 mingdin köpirek bolup, bularning hemmisila yéqinqi aylarda Xitayning ichki ölkiliridin <paxta térish> digen namda kelgen aqqunlar iken.
Bir – ikki ayliq paxta térish ishi üchün kelgen Xitaylarning ishchilar uyushmisigha ezaliqqa qobul qilinishi intayin normalsiz bir hadise bolup, bu, Xitay hakimiyitining ularni Sherqiy Türkistanda makanliship qélishqa qiziqturush üchün qollanghan alahide wastisidin ibaret, xalas!