Xitayning Chégra Mudapiye Qisimliri Nepalgha Qachqan Tibetliklerni Oqqa Tutti

<Germaniye dolqunliri> radiosining xewer qilishiche, ötken shenbe küni déngiz yüzidin 5800 métir igizliktiki Langhaba tagh éghizida Xitay chégra mudapiye qisimliri Nepalgha qarap qéchiwatqan bir top Tibetlikni oq yamghurigha tutqan, netijide ikki Tibetlik siyasi qachqun neq meydanda oq tégip ölgen, köp kishi yarilanghan. Shu künki chong qach – qachta 43 Tibetlik siyasi qachqun Nepalgha qéchip kiriwalghan.

Mezkur xewerde körsütülishiche, her yili köpligen Tibetlikler Himalaya taghliridin halqip Nepalgha qarap qachidiken, Xitay chégra mudapiye qisimlirining siyasi qachqunlarni oqqa tutush hadisiliri hemishe yüz bérip turidiken.

Birqache yil burunmu Shireli bashchiliqidiki bir gurup Uyghur siyasi qachqunmu ming bir Japalarni tartip, néchcha aylap piyade yol yürüp Nepalgha qéchip kirgen idi, eyni chaghda ularning siyasi panahliqi Birleshken döwletler teshkilati musapirlar ali kengishining Nepaldiki organliri teripidin qobul qilghan bolsimu, emma Nepal hökümiti Xitayning bésimigha boyun egip, Shirelini Xitaygha qayturup bergen, netijide Shireli Xitay teripidin wehshilerche étip öltürülgen, qalghan bezi Uyghur siyasi qachqunlar Yawropa ellirige yötkep kélingen idi.

Xitay hökümiti uzun yillardin buyan Nepaldiki Hökümetke qarshi Maozedungchi isyanchilarni astirttin qollap kelmekte, Nepaldiki Maozedungchi kommunistlar hazir bu döwletning köp qismining konturolliqini qolida tutup turmaqta, shunga Nepalda Xitayning tesiri helila küchlük.