Bayram Tesiratliri

Roxangül Turdi (München)

Bügün ikki Germaniyening birleshken küni, shundaqla Germaniye xelqining döwlet bayrimi, pütün German xelqi tentene, jushqu we xoshalliq ichide özlirining bu bayrimini tebriklewatidu.

Men birqanche yildin buyan ayilem bilen birge Germaniyening München shehride yashap kéliwatimen, elwettiki German xelqining bu bayrimi méningmu bayrimim, ularning xoshalliqi méningmu xoshalliqim, chünki Germaniye mening 2 – wetinim, bu weten manga qayta yashash imkaniyiti yaritip berdi we bu wetenning sayisida perzentlirim bilen birge yawuz xitayning ziyankeshlikidin qutulup qaldim. Emma men kindik qénim tökülgen ana wetinim Sherqiy Türkistanni bir künmu esimdin chiqirip qoyghinim yoq, gerche wetinim mendin nechche ming kilometir yiraqliqta bolsimu, emma men özemni goya unung illiq baghridin zadila ayrilip baqmighandek hes qilimen we uni kéche – kündüz qayghu we teswirlep tügetküsiz söygü ichide yad étip turimen. Shunga men bügün kochilarda milliyche kiyimlirini kiyiship xoshalliq ichide özlirining döwlet bayrimini tebriklewatqan German xelqini körüp, ixtiyarsiz halda özemdin, <biz Uyghurlargha xuddi mushu Germanlardek Döwlet bayrimini tentene bilen tebrikleydighan künler qachanmu nesip bolar?> digen so’alni sorudum we Sherqiy Türkistanda Xitay mustemlikichilirining zulmi astida qattiq eziliwatqan xelqimning échinishliq halitini köz aldimgha keltürüp cheksiz azaplandim.

Téxi bundin ikki kün burunla Kommunist Xitay hakimiyitimu özining döwlet bayrimini qutluqlighan idi, chetellerdiki Uyghur teshkilatliri Xitayning döwlet bayrimi künini <Uyghur xelqining matem küni> dep jakalap, Xitay elchixaniliri aldida namayish ötküzgen idi, menmu chetellerde musapir bolup yashawatqan bir Uyghur bolush süpitim bilen, teshkilatlirimizning bu chaqiriqini chin qelbimdin alqishlap, 10 – ayning 1 – künini qayghu we azap ichide ötküzdüm, qolumdin chong bir ish kelmisimu, héch bolmisa namizimda janabi Allahtin weten ichidiki xelqimge bexit we hörlük tilidim, <ey rebbim, biz bicharilerni öz döwlitimizning musteqilliqqa érishken künlirini körüshke nesip qilghin!> dep nale qildim.

Biz Uyghurlar elmisaqtin özimizge özimiz xoja bolup yashap kelgen, bizningmu musteqil döwlitimiz, bayriqimiz bar idi, Uyghur xelqimu huddi hazirqi erkin dunya xelqliridek hör, erkin we bexitlik yashighan idi, héch bir elge muhtaj emes idi, epsuski yawuz, wehshi Xitay mustemlikichiliri Uyghur xelqini pütün erkinliklerdin mehrum qaldurup, öz döwlitide we öz tupriqida musapirgha aylandurup qoydi … mushularni oylisam, kommunist Xitay hakimiyitige bolghan ghezep – nepritim we öchmenlikim hessilep ashidu.

Hudagha shükriki, wetinimning musteqilliqqe we xelqimning hörlükke érishishige bolghan ishench we ümidimni héch bir zaman yoqutup qoyghunum yoq, janabi Allah hemmige qadir, Xitay mustemlikichiliriningmu halak bolidighan künliri choqum kélidu, Uyghur xelqimu haman bir küni erlik dunya xelqliri sepidin tégishlik orun alidu !

                       2006 – yil 10 – ayning 3 - küni