Turpanda, Muqam Sen’itini Qoghdash We Tarqitish Merkizi Quruldi

Uyghur sen’itining jewhiri hisaplanghan 12 muqam, 2005 – yili Birleshken Döwletler teshkilati teripidin, < insaniyetning nuxtuluq qoghdilidighan éghiz edibiyati mirasi > katogoriyesige kirgüzülgendin buyan, chetellik sen’etkarlarning 12 muqamgha bolghan qiziqishi roshen derijide éship bardi we köpligen chetellik mutexesisler biwaste Sherqiy Türkistangha kélip, Uyghurlarning 12 muqami heqqide tekshürüsh élip bérishqa bashlidi.

BDT ning bu qarari, yene bir hisapta Xitay hakimiyitige biwaste bésim peyda qilip, ularning 12 muqamni qoghdash we tereqqi qildurush jehetlerde bezi ijabi qedemlerni bésishigha sewepchi boldi.

< Tianshan Tori > ning xewer qilishiche, Sherqiy Türkistandiki tunji < muqam sen’itini qoghdash we tarqitish merkizi > 9 – ayning 29 – küni Turpanning pichan nahiyesige qarashliq Lükchün yézisida qurulghan.

Pichanning Lükchün yézisi, Uyghurlarning < nazirkom usuli > ning merkizi bolup, bu yézide Uyghurlarning en – eniwiy naxsha – usul we muzika sen’itining saqlinip qélishi nahayiti mukemmel bolghan.
 

BDT ning muqam heqqidiki qararidin kéyin, Xitay hökümiti yuqarqi merkezni tésis qilish qararigha kelgen we merkez üchün Lükchün yézisini tallighan.

< Muqam Sen’itini qoghdash we tarqitish merkizi > üchün jemi 2 milyon yuandin köpirek meblegh sélinghan bolup, merkezning qurulush kölümi 1500 kuwadirat / metir kélidiken.

Merkezning shu künki échilish murasimigha Germaniye, Firansiye qatarliq 10 nechche döwlettin kelgen tetqiqatchilarmu qatnashqan, Lükchün xelqi chetellik méhmanlargha Uyghurlarning kilassik naxsha – usol nomurlirini orundap bérip, ularning alahide alqishigha érishken.

Yuqarqi xewerde körsütülishiche, kelgüsi 5 yil ichide Qeshqer, Ili, Aqsu, Hoten, Qomul qatarliq jaylardimu muqam sen’itini qoghdash we tarqitish merkezliri tésis qilinidiken.

Töwendiki sürette, merkezning échilish murasimidin körünüshler.