Hu Jin Tao Sherqiy Türkistanni Yoshurun Ziyaret Qildi

Xitay kommunistik partiyesi merkizi komutétining bash sekritari we Xitayning döwlet reyisi Hu Jing Tao, 9 – ayning 6 – künidin 11 – künigiche Sherqiy Türkistanda ziyarette boldi.

Xitay dayirliri bixeterlikni közde tutup, Hu Jin Taoning bu qétimqi ziyaritini intayin mexpi tutti, hetta < Xin Hua axbarat agentliqi > mu Hu Jin Taoning bu qétimqi ziyaret xewirini 5 kün ötkendin kéyin andin xewer qildi.

Chetellik bezi siyasi küzetküchiler, Hu Jin Taoning bu qétimqi Sherqiy Türkistan ziyaritining mexpi tutulghanliqining intayin normalsiz bir hadise ikenlikini, chünki ilgiri bundaq ehwal körülüp baqmighanliqini, her qétim Xitay rehberliri bu rayongha kelgende daghdughuluq halda teshwiq qilinip kélingenlikini eskertip, < Hun Jin Taoning ziyaritining mexpi tutulushi, Sherqiy Türkistanning siyasi weziyitining intayin jiddi ikenlikini, Xitay rehberliriningmu bu rayonda özlirini bixeter hés qilmighanliqini ochuqche körsütüp turmaqta > dep qarashmaqta.

< Xin Hua axbarat agentliqi > ning 5 kündin kéyin xewer qilishiche, 9 – ayning 6 – küni Ürümchige yétip kelgen Hu Jin Tao, Xitay merkizi hökümiti ishxanisining mudiri Wang Gang, < Aptonom rayon > rehberliridin Wang Le Quan, Ismayil Tiliwaldilarning hemraliqida Sherqiy Türkistanning Qaramay, Hoten, Ili, Ürümchi … qatarliq rayonlirini ziyaret qilghan, shundaqla Xitayning Sherqiy Türkistandiki herbiy qisimlirini we atalmish < Ishlepchiqirish qurulush Bingtuani > ni yoqlap, eskerlerdin hal sorighan.

Hu Jin Tao bu qétimqi ziyaret jeryanida, < Chong gherbi shimalni échish stiratigiyési > ni qet’i boshashmay dawamlashturush, bu rayonning muqimliqigha kapaletlik qilish we < Henzular azsanliq milletlerdin ayrilalmaydu, Azsanliq milletlermu Henzulardin ayrilalmaydu > deydighan < ikki ayrilalmasliq > idiyesini yenimu kücheytish, Deng Xiao Pingning < 3 ke wekillik qilish > idiyesini yenimu mustehkemlesh mesilisini nuxtuluq halda tekitlep ötken.

Hu Jin Tao yene < aptonom rayonluq partikom we xelq hökümiti > ning yéqinqi yillardin buyan qolgha keltürgen ajayip < muwappiqiyetliri > ge yuquri baha bergen.

Hu Jin Taoning bu qétimqi ziyaritining mezmonidin qarighandimu, merkizi Xitay hökümitining bundin kéyin Sherqiy Türkistan xelqighe qaratqan iqtisadi talan – taraj we atsimilatsiye siyasitini yenimu kücheytidighanliqi körülmekte. .