Sherqiy Türkistan Informasyon Merkizining Bayanati:

< Sherqiy Türkistan Allah Partiyesi > ning Asasliq Rehberliridin Alim Yunusning Shehit Qilinghanliqining 6 – Yilliqini Munasiwiti Bilen

Weten ichide Xitay mustemlikichilirige qarshi küresh élip bériliwatqan eng asasliq we eng jenggiwar milliy musteqilliq teshkilatlirining biri hisaplanghan < Sherqiy Türkistan Allah Partiyesi > ning asasliq qurghuchisi we rehberlirining biri Alim Yünüs 2000 – yili 7 – ayning 19 – küni Ürümchide Xitay jallatliri teripidin rehimsizlerche shehid qilinghan we unung wapati eyni chaghda xelqimizni bihisap ghayghulandurghan idi, unung wapatining 6 – yilliqi munasiwiti bilen, < Sherqiy Türkistan Allah Partiyesi > rehberlih hey’itige, merhumning hayattiki sepdashlirigha, shundaqla unung uruq – tuqqan, Ayile – tawabatlirigha yene bir qetim cheksiz qayghumizni we seghinishimizni izhar qilish bilen birge, ulardin qaytilap semimi hal soraymiz !

Uyghur xelqining batur oghlani Alim Yunus ( yene bir ismi Abdullah ), özining barliqini Mosulman Uyghur xelqining erkinliki, hürliki, azatliqi we eziz wetinining tel – töküs milliy musteqilliqigha beghislighan igilmes, sunmas jengchilirimizning biri idi, shehidimiz Alim, 1998 – yili yanwarda milliy munapiqlarning satqinliqi bilen, Xitayning Xian shehride qéchip yürgen yeride qolgha élinghan, gerche Xitay Fashistliri uni taki shehid qilinghan 2000 – yili 7 – ayning 16 – künigiche bolghan ikki yildin köpirek waqitqiche insan qélipidin chiqqan wehshi usollar bilen keche – kündüzlep qattiq qiyin – qistaqqa, qolidin kélidighan barliq qattiq – yumshaq usollirining hemmisini ishqa salghan bolsimu, emma qehriman oghlanimiz Alim Yüsüp Xitay jallatlirigha qilche tiz pükmigen we sheripi, nomusi, pak imani bilen shahadetke erishken idi. Téxi emdila 28 yashqa kirgen milliy qehrimanimiz, özining qisqighine küresh hayatida tillarda dastan bolghudek qehrimanliq we sadaqetmenlik hikayilirini qaldurup ketken, özining polattek küresh iradisi arqiliq, téximu köpligen Uyghur oghlanlirining milliy küresh sepige atlinishigha türtke bolghan idi.
Bu munasiwet bilen biz dunyagha shuni jakalimaqchimizki, Amerikida yüz bergen < 11 – sintebir terör weqesi > din buyan, Kommunist Xitay hakimiyiti Sherqiy Türkistanda uzun yillardin buyan Xitay mustemlikisige qarshi élip bériliwatqan milliy heriketlirimizning xarektiri we nishanini burmilap, Uyghur qarshiliq körsütüsh teshkilatlirini xelqara siyasi sehnilerde üzlüksiz qarilap kelmekte we bu teshkilatlarni < terorist teshkilatlar >, ularning hadimlirini bolsa < teroristlar > dep élan qilip, bu arqiliq, özlirining Sherqiy Türkistan xelqighe qarita yürgüzüp kelgen Fashistik siyasitini yoshurushqa urunup kelmekte.
< Sherqiy Türkistan Allah Partiyesi > bolsa eneshu Xitay hakimiyiti teripidin Nuxtuluq qarilinip kéliniwatqan we eng asasliq zerbe bérish nishani qilinghan teshkilatlirimizning biridin ibaret. Xitay hakimiyiti teripidin kéyinki yillarda élan qilinghan bayanat we Höjjet – matiriyallarda, < Sherqiy Türkistan Allah Partiyesi > bolsa < Radikal islamchi teroristik teshkilat > dep tilgha élinmaqta we unung rehberliri hem xadimliri, < Radikal islamiy teroristlar > dep qarilanmaqta.
Epsuski, Xitayning deplomatiye jehette élip barghan buxil siyasi hujumliri we töhmetliri tüpeylidin, bezi xelqaraliq teshkilatlar < Sherqiy Türkistan Allah Partiyesi > ge guman bilen qarashmaqta, hette bezi Uyghur teshkilatliri we Uyghur siyasiyonlarmu bu teshkilattin özini qachurup, mumkin bar uni tilgha almasliqqa, xelqara sehnilerde ularni ochuq – ashkare halda qollashtin özini tartishqa tiriship kelmekte, Xitayning tetür teshwiqatining netijiside shekillengen bu hal, tabiy halda weten ichide Xitay mustemlikichilirige qarshi küresh qiliwatqan teshkilat we Shexislirimizni qattiq epsuslandurmaqta.
Emiliyette bolsa < Sherqiy Türkistan Allah Partiyesi >, Xitay hakimiyitining ichki teshwiqatlirida qarilighinidek qandaqtur < noqul halda radikal islamni terghip qilidighan, özliri bilen oxshash qarashqa ige bolmighan hemme kishige qarshi turidighan, pütün kapirlarni qirip tügütüshni ghaye qilghan qarangghu teshkilat > bolmastin, belki ghaye we meqsetliri éniq bolghan, pütün sherqiy türkistan xelqini baghrigha basqan, peqetla < kapirlarni qirip tügütüsh > emes, belki Sherqiy Türkistan ziminida Xitay mustemlikisige xatime bérishni, hem Xitay xelqighe, hem Sherqiy Türkistan xelqighe balayi – apet élip kéliwatqan kommunistik hakimiyetni aghdurup tashlashni asasi nishan we ghaye qilghan heqqani bir qarshiliq körsütüsh orgini ikenlikini körüwélish tes emes.
Mesilen, Xitay hakimiyitining mezkur teshkilat heqqide < 11 – sintebir weqesi > din burun élan qilghan bayanliri bilen, < 11 – sintebir weqesi > din kéyin élan qilghan bayanliri otturisida asman – zimin periq mewjut bolup turmaqta.
Mesilen, atalmish < Xinjiang Uyghur aptonom rayoni Qeshqer wilayetlik partikom birliksep bölümi bilen memuri mehkime > teripidin 97 – yili tüzüp tarqitilghan < milliy Bölgünchilik, her millet xelqining ortaq düshmini > serlewhelik teshwiqat kitabida, < Sherqiy Türkistan Allah Partiyesi > teripidin tarqitilghan bir teshwiqat wariqi tilgha élinip eynen mundaq dep körsütülgen:
< Allah Partiyesining 19 – nomurluq buyruqi da, ochuq – ashkare qutratquluq qilinip, “ barliq oqughuchilar, ziyalilar, ishchilar, dehqanlar, shunungdek sodigerler hazirdin bashlap chong – kichik gurohlarni teshkillep, yighilish ötküzüsh, namayish qilish, küch körsütüsh, deris tallash, ish tashlash qatarliq paaliyetler bilen shughullunup, ulargha özimizni tonutup qoyayli, xelqara jemiyet bizni qollaydu „ diyilgen >.
Mezkur kitapta yene, Allah partiyesining ghayisi we meqsidining délili süpitide bu partiyening “15 – nomurluq buyruqi „ ning mezmoni tilgha élinghan bolup, bu heqte eynen mundaq diyilgen:
< ular tigh uchini biwaste döletke we sotsiyalistik tüzümge qaratti, bu janliq pakitlar kishilerge ularning élip barghan türlük buzghunchiliq heriketliri hergizmu milliy mesile yaki Diniy mesile bolmastin, belki ularning meqsidi kompartiye rehberlikini aghdurup tashlap, unung ornigha ularning Allah partiyesini dessitish, sotsiyalizim tüzümini aghdurup tashlap, unung ornigha ularning hakimiyet bilen din birleshtürülgen ijtimayi tüzümni dessitishtin ibaret ikenlikini chüshendürüp béridu >.
Yuqarqi ibariler, nöwette pütün dunyagha bu partiyeni < xelqara terorizimning bir parchisi > dep tonushturushqa tiriship kelgen Xitay hakimiyitining saxtipezlikining éniq délilidin ibaret.
Buyerde Xitay hakimiyitining yene chong bir siyasi saxtipezliki shiki, bir tereptin deplomatiye jehette < Sherqiy Türkistan Allah Partiyesi > ni qandaqtur anti Amerika ( Amerikigha qarshi idilogiye ) tüsini alghan < xelqara terorizim > ning bir parchisi dep qarilisa, ichki jehette del bunung eksiche, bu teshkilatni Amerika we gheripning tesiri astida qurulghan teshkilat dep xelqqe teshwiq qilmaqta.
Mesilen, yuqarqi kitapta bu heqte eynen mundaq diyilgen:
< 1995 – yili etiyaz peslide, Amerika bashchiliqidiki gherip düshmen küchlirining bizge qarita jiddi élip barghan “ parchilash „ we “ gheripleshtürüsh „ tin ibaret stiratigiyélik süyqestining tesiri astida, wilayitimizdiki milliy bölgünchiler milliy bölgünchilik süyqestini keng kölemde terghip qilip, eksiyetchil teshkilatlarni tereqqi qildurdi … >.
Dimek, Xitayning ichki teshwiqatlirida yer alghan yuqarqi bayanlar, ularning xelqara siyasi sehnilerdiki sheytani yüzüni ochuqche körsütüp turmaqta. Mana shunung üchünla Uyghur xelqi Sherqiy Türkistanning milliy musteqilliq kürüshi bilen shughulliniwatqan hechbir teshkilat we shehisni < teroristik teshkilat > yaki < terorist > dep qarimaydu, xelqimizning neziride ular erkinlik jengchiliri, emiliyettimu hem shundaq, chünki Sherqiy Türkistan xelqining milliy musteqilliq kürishi < 11 – sintebir weqesi > din kéyinla peyda bolup qalghan emes, belki u esirlerdin buyan izchil dawamliship kelmekte we unung ghayisi hem meqsidimu esirlerdin buyan hechbir özgürüsh bolghini yoq, shunga biz chetellerde yashawatqan Uyghur qerindashlirimizni Xitay hakimiyiti teripidin xelqara siyasi sehnilerde qariliniwatqan herqandaq teshkilat we shexislirimizge yüreklik bilen ige chiqishqa, ularni merdanilerche qollap – quwetleshke chaqirimiz !

Hörmet bilen:

Abduljelil Qaraqash

< Sherqiy Türkistan Informatsiyon Merkizi > ning Pirezidenti

Perhat Yorungqash

< ETIC – Uyghur Tetqiqat Merkizi > ning reyisi

2006 – yil 7 – ayning 16 – küni
Germaniye - Miyonhin