< Sherqiy Türkistan Informatsiyon Merkizi > ning Pirezidenti Abdujelil Qaraqash Ependi, Germaniyediki Asasliq Türk Teshkilatlirigha Sherqiy Türkistan Mesilisi Heqqide Melumat Berdi

Öz xewirimiz: < Sherqiy Türkistan Informatsiyon Merkizi > ning Pirezidenti Abdujelil Qaraqash ependi, Germaniyening herqaysi jayliridiki Türk teshkilatlirining teklibige asasen, 6 – ayning 14 – künidin 21 – künigiche bu teshkilatlarni bir – birlep ziyaret qilip, teshkilat mesulliri we ezalirigha Sherqiy Türkistanning omomiy weziyiti heqqide tepsili doklat berdi we ularni Uyghur xelqining milliy musteqilliq herikitini qollap – quwetleshke chaqirdi.

Abdujelil ependi, jem’i 8 kün dawam qilghan bu qétimqi ziyariti jeryanida, ilgiri – kéyin bolup, < Fürt Ata Türk Mediniyet Merkizi >, < Nürnberg Türk Öyi >, < Germaniye Demokratik Türk Birliki - UETD > ning Duisburg shöbisi, < Yawropa Türk Islam Birliki – ATIB > ning Dinslaken shöbisi, < Duisburg Kishilik hoqoq teshkilati – HDR >, < Duisburg Diyanet Ishliri Jemiyiti - DITIB > … qatarliq jemiyet we teshkilatlarni ziyaret qilip, ularning asasliq rehberliri bilen söhbet élip bardi we bu teshkilatlarning mexsusla Abdujelil Qaraqash ependining sheripige orunlashturup bergen Sherqiy Türkistan mesilisi heqqidiki söhbet yighinlirida, Abdujelil ependi teshkilat rehberliri we ezalirigha Sherqiy Türkistanda dawam qilip kéliwatqan Xitay zulmini we Uyghur xelqining bu zulumlargha qarshi élip barghan milliy küreshlirini tepsili anglitip ötti.
Abdujelil ependi özining doklatigha birleshtürüp, Xitay hakimiyitining Sherqiy Türkistandiki türlük zulumliri ekis’ettürülgen foto – süret we vidio filimlirini körsetkini üchün, unung doklati yighin qatnashquchilirining alahide diqqet – étibarini qozghidi, Abdujelil ependi yene yighin ehlining Sherqiy Türkistan we Uyghurlar heqqide sorighan türlük soallirigha estayidilliq bilen jawap berdi.

Abdujelil Qaraqash ependi doklatlirida, nöwette Xitay hakimiyitining Uyghurlargha qarita mejburi dinsizlashturush siyasitini yürgüzüp, ularni milliy we diniy alahidilikliridin waz kechishke qistawatqanliqini, Xitayning türmilirining Uyghur diniy zatlar bilen tolup tashqanliqini, ölüm jazasigha höküm qiliniwatqan Sherqiy Türkistanliqlarning mutleq köp qismining diniy zatlardin teshkil tapqanliqini alahide eskertip, tarix sehnisidin yoqulup kétish girdawigha bérip qalghan Sherqiy Türkistan xelqighe maddi we meniwiy jehettin yardem bérishke chaqirdi.

Abdujelil ependi, Xitay hakimiyitining Uyghurlargha qaratqan dinsizlashturush siyasitige örnek süpitide, Xitay hökümitining Sherqiy türkistandiki pütün mesjidlerning üstige ésip qoyghan < hökümet uxturushi > ni délil qilip körsetti.

Besh maddiliq Bu uxturushta mundaq diyilgen:

< Töwendiki kishilerning mesjidke kirip diniy pa'aliyet bilen shughullunushigha bolmaydu:
1 ) Partiye, Ittipaq ezaliri.
2 ) Dölet ishchi – xizmetchiliri, dem élishqa, pinsiyege chiqqanlar.
3 ) 18 yashqa toshmighan yash – ösmürler.
4 ) Kenit kadirliri.
5 ) Ayallar.

Xitay hakimiyitining yuqarqi élani, yighin ehlini intayin ghezeplendürdi.
Herqaysi Türk teshkilatlirining rehberlirimu Abdujelil ependi bilen ötküzgen söhbetliride, Yawropadiki Türklerni, özlirining qan we din qérindashliri bolghan Uyghur xelqighe her jehettin yardem bérishke seperwer qilipla qalmastin, belki Xitay hakimiyitining Uyghur xelqighe séliwatqan zulumlirini Yawropa döletlirige anglitishtimu wastiliq rol oynaydighanliqlirini bildürüshti.

Yuqarqi Türk teshkilatliri Yawropa we Germaniyede intayin küchlük nopozgha ige bolup, ular yerlik hökümetlergimu biwaste tesir körsütüp kelmekte. Mesilen, < Germaniye Demokratik Türk Birliki - UETD > teshkilati, Türkiye Jumhuriyirining nöwettiki bash ministiri Rejep Tayip Erdoganning biwaste teshebbusida qurulghan bolup, bu teshkilatning Germaniye we Türkiyede siyasi tesiri intayin küchlük.

< Yawropa Türk Islam Birliki – ATIB > teshkilati bolsa Yawropa boyiche körnerlik Türk teshkilatliridin béri bolup, bu teshkilatning herqaysi döletlerde nechche minglighan ezasi bar.

Abdujelil Qaraqash ependi buqétimqi ziyariti jeryanida yene Türklerning asasliq teliviziye qanalliridin < ATV > ning Germaniyediki munasiwetlik wekilliri bilen mexsus uchrushup, ulardin mezkur qanalda Uyghurlar heqqide köplep purogramma bérishni telep qildi.

Abdujelil ependi bu qétimqi ziyariti jeryanida, Germaniyening Duisburg shehride < Sherqiy Türkistan Informatsiyon Merkizi > ning wakaletchilik orginini qurdi we Fatih Aqgün ependini bu organning wakaletchilikige teyinlidi.